Inkastoo weli ay socdaan baaritaanno la xidhiidha sababtii ay diyaaradda Ruushku leeyahay ay u soo dhacday, ayaa haddana wararkan soo baxay noqonayaan kuwo hordhac ah oo ay sirdoonku heleen.
Dowladda Britain ayaa xilli hore joojisay duulimaadyadii ay magaalada Sharm el-Sheikh ku tegi jireen dalxiisayaasheeda, magaaladaasoo ah halkii ay kasoo duushay diyaaraddan Ruushku lahaa ee burburay.
Xukuumadda Masar ayaa waxay diidday sheegashada ah in maleeshiyaadka lala xidhiidhiyay kooxda Islaamiga ah ee Daacish ay soo rideen diyaaradda, kuwaasoo maalintii ay dhacday diyaaraddan sheegtay inay masβuul ka yihiin soo dhicideeda.
Sidoo kale, khubaro Ruushan ah ayaa sheegay inay xilli hore tahay in la sheego sababta ay u soo dhacday diyaaraddan la sheego, iyadoo xukuumadda Moscow ay sheegtay dhankeeda inaan laga hor-dhicin sababta ay diyaaraddu u soo dhacday inta uu socdo baadhitaanka.
Arbacada shalay ayay saraakiisha dalka Masar waxay sheegeen in qaybta codka duubto ee diyaaradda Metrojet 321 uu dhaawac xun kasoo gaadhay burburkii diyaaradda.
Ugu dambeyn, Khuburada baaritaanka shilkan diyaaradeed ayaa waxaa u suuro-gashay in ay xog ka helaan sanduuqa madow ee diyaaradda, kaasoo haatan ay baaritaanno ku hayaan khuburada, sida uu sheegay wasiirka duulista rayidka ee Dalka Masar, Maxamed Xusaam Kamaal.
HargeisaPress News Desk β Hargeysa