Bullo-xaar (HP): Wasaaradda caafimaadka Somaliland ayaa baabuur nooca gar-gaarka deg dega ah gaadhsiisay magaallo xeebeedka qadiimiga ah ee Bullo-xaar ee gobolka Saaxil.
Baabuurkan unbalance ka ah oo uu hore madaxweynaha Somaliland ugu balan qaaday inuu gaadhsiin doono bulshadda deegaankaasi ayaa maanta lagu wareejiyay maamulka wasaaradda caafimaadka ee degmaddaasi.
Munaasibadii wareejinta baabuurkaasi waxaa ka qayb galay maamulka gobolka Saaxil, ka degmadda Berbera, xildhibaanno ka tirsan golaha deegaanka Berbera, iyo murashaxiin degmadaasi ka soo jeedda.
Sidoo kale waxaa munaasibadaasi goob joog ka ahaa isuduwaha wasaaradda caafimaadka Saaxil, xubno ka tirsan guddiga horumarinta caafimaadka gobolka Saaxil, madax dhaqameed iyo masuuliyiin kale.
Geesta kale odayaasha, waxgaradka iyo qaybaha kala duwan ee bulshadda ku nool degmadda Bullo-xaar ayaa si weyn uga mahad celiyay helitaanka baabuurkan unbalance ka ah.
Waxaanay sheegeen in ay baahi weyn u qabeen helitaanka gaadhigani, isla markaana ay uga maahd celinayaan madaxweynaha Somaliland iyo cid kastoo ka qayb qaadatay in baabuurkan la gaadhsiiyo.
Hargeisa Press.com/Hargeisa Office.