Hargeysa,(HargeisaPress) —Wasiirka Wasaaradda Horumarinta Maaliyadda Jamhuuriyadda Somaliland Dr. Sacad Cali Shire, ayaa been aan sal iyo raadtoona ku tilmaamay in Xukuumadda 80 kun oo doolar oo dayn ah kala wareegtay Xukuumaddii Madaxweyne Axmed Siilaanyo.
Wasiir Sacad Cali Shire oo maanta warbaahinta kula hadlay xafiiskiisa ayaa sheegay in aanay waxba ka jirin hadal kii soo yeedhay xildhibaan Ibraahim Mahdi buubaa ee ku wajahnaa in 80 milyan oo doolar oo deyn ah lagu leeyahay Xukuumadda.
“In 80 kun oo doolar oo deyna lagu leeyahay Xukuumadda tiro saxa maaha, waxa shir noogu yeedhay maalintii Isniinta Guddida ilaalinta iyo dabgalka hantida qaranka ee Golaha Wakiillada waxaanay noogu yeedheen inaanu la wadaagno warbixintii uu ka soo bixiyey Hantidhawraha guud ee qaranku miisaaniyaddii Sannadkii 2017dii, waxaanu ka wada hadlaynay sidii sharciga loo raaci lahaa maareynta deynta,”ayuu yidhi Wasiirka Horumarinta Maaliyaddu.
Wasiirku wuxuu intaas ku daray; “Markii aanu aanu ka soo baxnay kulankii oo ay aheyd in aanu intaas uun ka sheegno ayaa xildhibaanku uu ku daray waxyaabo aanaan ka wada-hadal oo aan jirin,waxaana ka mid ah waxyaabaha aan jirin ee uu sheegay Xildhibaanku waxa ka mid ah 80 Milyan oo doolar oo dawladda lagu leeyahay, kuma qorna warbixintii uu u soo gudbiyay Hantidhawraha guud, Guddida ilaalinta iyo dabogalka hantida qaranka waxaanu ka wada-hadlayna maaha guddida ilaalinta iyo dabgalka hantida Qaranka.”
“Malaha xildhibaanka siyaasada ayaa yara jiidatay, laakiin waxaanu ka wada hadalnay maaha, deyntu waa laba qaybood oo kala ah biilal soo raacay Miisaaniyadda oo shiidaal ayaa la sii qaadanayaa iyo qof qandaraas la siinayo oo wax dhisaya. markaa daymo sidaa ah oo taxane ah way jiraan dawlad waliba deynta way gashaa,laakiin deynta nalagu leeyahay waa bilashaa miisaaniyadda ku jiray ee xaga danbe laga bixinayo. Haba yaraatee ma jirto cid deyn nagu lihi,”ayuu yidhi Wasiir Sacad Cali Shire.
HargeisaPress News Desk- Hargeysa