Hargaysa(Hargeisa Press.com):Isuduwaha wasaarada caafimaadka ee gobolka Sool ayaa deeq dawooyina gaadhsiiyay xarunta caafimaadka ee degmada Kalabaydh oo ka tirsan gobolka Sool.
Dr. Bile Maxamuud Cali, isuduwaha wasaarada caafimaadka Sool ayaa kula dardaarmay masuuliyiinta caafimaadka ee degmada Kalabaydh in ay ku faro adaygaan daawooyinkan loogu deeqay.
Waxaanu u soo jeediyay in sii laban laabaan shaqada caafimaadka ee bulshadda u hayaan.
Bile Xaaji Maxamuud Cali, oo arrimahaasi ka hadlayay na waxa uu yidhi “Aad iyo aad ayaan ugu mahad celinayaa shaqaalaha wasaarada caafimaadka ee degmada Kalabaydh sida ay heeganka u yihiin ee ay ugu shaqaynayaan dadka jilicsan wakhtigan adag.
Daawooyinkaa aanu idiin keenay waa in aydin ku faro adayg-taan. Markaa dadka jilicsan ee goobahaa miyiga ah ka imanaya iyo dadka soo barakacay ee aan waxba haysan waa in daawooyinkaa aad siisaan”.
“Waanay muuqataa saamaynta abaarta iyo biyo la’aantu ku yeelatay degmada Kalabaydh. Markaa waxa aan rejaynayaa in shaqaalaha degmada kalabaydh ee caafimaadka heegan u ahaataan oo aad sii laban laabtaan shaqada aad haysaan.
Waxaana aan mari doonaa xarumaha caafimaadka ee gobolka Sool ee shaqaynaya, waxaanan ogaan doonaa xaalada dadku ku sugan yihiin iyo xarumuhu wixii daawooyina ee ay haystaan”ayuu yidhi isuduwaha caafimaadka ee Sool.
Geesta kale maamulaha xarunta caafimaadka degmada Kalabaydh ayaa isna sheegay in uu soo dhawaynayo daawooyinkan la soo gaadhsiiyay, isla markaana si hagar la’aana ay ugu shaqayn doonaan dadweynaha ku dhaqan degmada Kalabaydh.
Hargeisa Press.com/Hargaysa Somaliland.