Laba kaclayntii Silsiladii Deelay Oo ku Bilaabantay Maansada Daalacan Kana Hadlaysa Duruufaha Siyaasadeed Ee Dalku Ku Sugan Yahay.
“Mar haday dirsoociyo
Daw dhaafka xeerkiyo
Dulmi ay wadaagaan
Mar hadaan dulqaadiyo
Dabci lagu hogaanshiyo
Daganaansho lagu hubin
Mar hadii ducaalow
Xeer lagu dabraayoo
Xisbinimada daafaca
Sharcigooda lagu darin
Mar hadii daryeeliyo
Danta guud waxuu taray
Dadku aanay garanayn
Isku soo dabaaloo
Mar hadii ducaalow
Daacadnimo ka dheer tahay!!!!!
Ugu horayn waxaan Alle uga baryayaa in uu Jannatu Fardawsa ka Waraabiyo Marxuum Aqoonyahan, Abwaan Maxamad Xaashi Dhamac Gaariye oo Daah furay Silsiladii Deelay Dabayaaqadii Sannadkii 1979 iyo Dhamaan Abwaaniintii Geeriyootay ee ka qayb qaatay Silsiladii Deelay inta Noolna ALLE Caafimaad iyo Cibaado haku Arsaaqo Laba kaclaynta Silsilada Deelay iyo Duruufaha Siyaasadeed ee Maanta Dalku ku sugan yahay oo ku bilaabantay Maansada ( DAALACAN ) waxaa curiyay Abwaan Sacad X Maxamuud Gadhle 10/10/2016 waa Maanso Abwaanku kaga hadli doono Duruufaha Siyaasadeed ee ku gadaaman dalka iyo Dabarka Adag ee lagu xidhay Geedi socodkii Dimuquraadiyada S/land oo lagu tilmaami karo Maahmaahda Soomaaliyeed ee odhanaysa ( Ruqe Ninkii Lahaa Dabada Hayaa Ma Kaco ) Mar kale Midhaha Maansadani waxay iftiimin doonaan Isbadaladii ugu danbeeyay ee Saaxada Siyaasada ka dhacay iyo Go”aanadii ay ka qaateen Siyaasiyiintu oo Salka ku haya Dano Shaqsiya oo fashilan marka laga reebo Ashqaas Gaara oo qaatay Go”aan waayo aragnimo Siyaasadeed Xambaarsan Isbadaladii Saaxada Siyaasada ka dhacay Maansadan oo Abwaanku ugu magac daray ( Daalacan ) sida magaceeda ka muuqata waxay Daaha ka qaadi doontaa Tartanka fashilan ee Xisbiyada Siyaasada oo Mabda iyo Fikir ay ku kala duwan yihiina aanu jirin iyo Dabeecadaha ay ku dhaqmaan Siyaasiyiinta Saaxada Siyaasada Safka hore kaga jiraa oo ah mid ka hadalkeeda mudan waaxaanu Maansada Daalacan ku bilaabay sidan .
Waayadan ducaalow
Deelayda maansiyo
Murti daah furkeedii
Dabnahayga uma furin
Danbi dhacay ma faalayn
Diiwaanka gabaygiyo
Suugaanta kuma darin
Wali Doodba kama furin
Dacalada aduunkiyo
Darifyada ma gaadhsiin
Maantana ducaalow
Daymadii abwaankiyo
Diiradiisii dheerayd
Daalacan ku soo sheeg
Dakharada siyaasigu
Dumadiisa kala galo
Ama duunyo kala helo
Ama dayn la kala tago
Baritana ducaalow
Dafiraadu fududahay
Nin ilduufay loo tudhun
Dacwadooda maan qorin
Wali dood kamaan furin
Daliilkeedu waxuu yahay
Durba fiiro dheeruhu
Durki fahanka sheekada
Dadaalkiina libin laab
Dabadeedna xaajada
Dib u eegistuu waday
Isagoo digniin qabay
Dibindaabyo loo dhigay
Ka dabaalay gabigood
La dardaaran shacabkii
Talo daawo noqotoo
Isku duubni keentoo
Ninkastoo dareenloo
Damiirkiisu nool yahay
Qaranimo u dayr tahay
Marna aanu diidayn
Maqalkooda deeqsii
Daliilkeedu waxu yahay
Raga kii digtoonaa
Digorogashadoodii
Iska diid hayaankii
Nacaskuna docdiisii
Dalandool socdaalkii
Xisbigii ka digo rogay
Nin ka duday xilkiisii
Kuba daali maayee
Ma ogtahay ducaalow
Duqay waayo aragoo
Dugsi gaara furatoo
Duruus gaara bixisoo
Arday dooran qoratoo
Casharada duxdoodiyo
Darsi gaara siisoo
Dalka lagu hagaa jira
Ma ogtahay ducaalow
Rag daboolka saaroo
U faq daaya madaxdoo
Ka ilaasha dibadoo
U diyaarabaa jira
Ma ogtahay ducaalow
Nin dabaalanaayoo
Daldalool ka eegtoo
Dugsanaaya beentoo
Dabayl raacayaa jira
Ma ogtahay ducaalow
Rag dilaala beentoo
Dakhli badan ku qaatoo
Ka danaystaybaa jira
Daliilkeedu waxu yahay
Dib u curashadeenee
Xeerkiyo distoorkii
Dimuquraadi lagu qoray
Foodka loo dareeree
Doorashooyin lagu galay
Rag dabraaya baa jira
Xisbiyada docdoodii
Rag duleeyaybaa jira
Bahal daba qaloociyo
Dulin lagu abuuroo
Dildilaacshabaa jira
Daliilkeedu waxu yahay
Waa duul siyaasiya
Dir kastoy wadaagaan
Damacbaa dhex yaaloo
Dagaal hoosebaa jira
Duulaanku waa hadal
Waa dood afmiishaar
Dablay loo hubeeyiyo
Daba laabka qorigiyo
Dilku waa ka xaaraan
Darajada u waynee
Dalacaada bixisee
Dadku ay jeclaystaan
Dariiqeeda loo maro
Dalcad weeyi dheeroo
Figta buurta daaliyo
Daruurtay la siman too
Dabin iyo shirqooliyo
Dakanooyinbaa yaal
Damanaha war mooga ah
Laga daday xanteedoo
Waa lagu danbaabaa
Qof kastoo daneeyoo
Damaceedu qaadaa
Raaxadaa ka durugtoo
Dirqibuu u nool yahay
Da”ana way ku korodhaa
Daliilkeedu waxu yahay
Xilldhibaan la doortoo
Xillka duubka loo sudhay
Danyartiyo miskiinkiyo
Dabatada kaluunkiyo
Bulsho duurka joogtoo
Duunyada kusoo dhaqa
Daryeelkooda muu siin
Daliilkeedu waxu yahay
Dadka diiftu haysee
Baahidu la daristee
Daranyadu u wehel tahay
Rag u soo dalxiisoo
Doonyaha ku gooshoo
Diyaarado u raacoo
Darajada u waynee
Dalacaada bixisiyo
Madaxnimo ka doonoo
Ka danaystay waayadan
Dacwadooda maan qorin
Wali dood kamaan furin
Mar labaad ducaalow
Raga dayrka dhaafee
Doobigoodu buuxee
Tartan loo diyaarshee
Dalbanaaya madaxnimo
Labadaba doraadbaan
Xukunkooda daawaday
Daliilkeedu waxu yahay
Mar haday dirsoociyo
Daw dhaafka xeerkiyo
Dulmi ay wadaagaan
Mar hadaan dulqaadiyo
Dabci lagu hogaanshiyo
Daganaansho lagu hubin
Mar hadii ducaalow
Xeer lagu dabraayoo
Xisbinimada daafaca
Sharcigooda lagu darin
Mar hadii daryeeliyo
Danta guud waxuu taray
Dadku aanay garanayn
Isku soo dabaaloo
Mar hadii ducaalow
Daacadnimo ka dheer tahay
Laba daran mid dooray
Dadka ay u joogtaa.
DHAMAAD MAANSADA ( DAALACAN ) EE ABWAAN SACAD X MAXAMUUD GAHLE