Hoobaanta nolusha waa natiijada ka dhalataya dabeecada dhafan iyo Dhaqamada kala duwan ee ay xanbaarsantahay naftu taas oo inta badan kasoo fulla dareen taban ee maskaxdu leedahay.
Hoobaantu waa Qaybkamida midhaha taas oo garasho u ah abqaalkii wanaagsanaa ee dhirta iyo maxsuulka ugu danbeeya ee laga dhaxlo ama laga dheefsado dhirta xilliga gu,ga ee barwaaqada iyo badhaadhaha.
Halabsiga hoobaanta iyo gurashada midhaha iyo rucubta, geedaha barwaaqoobay bilicda quruxdasan ee eebe ku manaystaytay magoolka dhirta oo hirka iyo laaca laamaha dhaayihii milicsada daymadooda iyo dhugashadooda aanay ka dhergayn kaymaha waawayn ee gondaha isla wada galayna ayay hobaanta dhirtu ka mid tahay naftuna ay ku diirsata kuna doogsataa.
Siddaa si lamida ayuu qofkuna leeyahay hobaan nololeed oo dheelitir iyo Dhugasho dheeraada u noqda dadka iyo deegaanta ku xeeran , wanaaga ku dhisan hiigsiga dheer ee xalkiisu yahay in aad ku faraxdo natiijada nololeed iyo dabeecadaha wanaagsan ee qofku lasoo halgamay ayaa keena inaad u bogto naftaada dadkuna ay kula majeertaan kuuguna hambalyeeyaan wanaagsii shaqsiyadeed iyo dadaalkii dadnimada ku dhisnaa ee karti qaybisga ku dhisnaa sababta oo ah horaa loo yidhi “Noolow dadkana u Ogolow inay nolaadaan”
Sugaanta badanaa waa lagusoo halqabsadaa oo amaan ahaan ayay Abwaanadu u adeegsadaan iyagoo hogo tus uga dhiga bisaylka hoobaanta Dhirta iyo iyo natiijooyinkii jacaylka lagusoo beeray oo gurasho jooga , mararka qaarna waxaaba loosoo qaata bilicda san ee hablaheen.
Muuqaalka guud iyo oogada sare ee qofka kama turjimayso garashooyinka fog iyo fannaanimada nolosha balse waa waxa ku gadaaman nolosha oo guntiisa iyo xagiisa hoose ku soohan kuna dhaadhacsan kana ifaya sidda shamac baxaya oo kale.
Qofka waxaa Qofnimadiisa sheega cabir wiqiyadeedka ku lingaxan uurka iyo qalbiga hoose dhadhanka iyo qiimaha noloshana waxa uu u yeela garasho xeel dheer oo abuur iyo cusboonayn leh.
Qofka koriinkiisa ,jirritaankiisa, horumarkiisa , tanaad iyo tisqaadkiisa, samaha iyo sareedadiisa waxay ku iman karaan waa gibilka dahsoon ee abuura riyooyinka iyo Hoobaanta nolosha amaba abuura barwaaqada iyo badhaadhaha nolosha wanaagsan oo sacaado iyo sareedo badan debci wanaag, dadnimo suuban,dun xarriireed ,dareen kalgacal,saaxiibtimo cudoon , aaminnaad iyo ruux xilkas iyo xogogaal noloeed leh hankiisuna uu sarreeyo.
Hadaba maanka qofku ama maskaxduba qofka waxay u u tahay xarunta ay kasoo unkamaan dabeecado dhafan oo isku jira ,kuwaasi oo biqla ama abuura dabeecada iyo dadnimo uu u muujinayo qofku marka uu la dhaqmayo dadka ku xeeran iyo deegaankaba.
Maskaxda oo Allah “SWT” ugu Deeqay kuna galladay addoomihiisa ayaa howlgallo badan kuwaasi oo Damiir ,Dadnimo wanaaga dhalliya taas oo maskaxdu inoo tanaadiso feker,fahan,falanqalayn, fayooban, xasuus ku lingaxan laffoguris qoto dheer , howlkarnimo qofeed , dedaal iyo dulqaad shaqsiyadeed kaas oo farra qofka dabacsanaa iyo dadaal ay ku dheehantahay tanaasul iyo is dhul dhigid.
W/Q:- MAXAMUUD CARAB CABDI (SABUUB)