Muqdisho (Hargeisa Press) – Wararka hada ka imanaya magaalada Muqdisho, ayaa waxaa ay sheegayaan in goordhawayd hoobiyeyaal lagu garaacay agagaarka Madaxtooyada Soomaaliya.
Wararka, ayaa intaa ku daraya in Hoobiyeyaashan lagu garaacay agagaarka Madaxtooyada Soomaaliya ay tiro ahaan gaadhayaan ilaa 6 hoobiye.
Sidoo kale, Hoobiyeyaashan, ayaa la sheegay inay ku dhaceen qaarkood Isgoyska Ceelgaabta agagaarka Beerta Nabadda iyo SYL oo dhamaantood ku yaala afaafka Madaxtooyada Soomaaliya.
Lama ogo ilaa iyo hada khasaaraha ka dhashay hoobiyeyaasha goordhawayd lagu weeraray afaafka Madaxtooyada Soomaaliya, iyada oo inta badan degmooyinka gobolka Banaadir laga maqlayay jugta hoobiyeyaasha.
Geesta kale, wararka ayaa intaasi ku daraya in la xidhay isku socodka wadada Maka Al-mukarama gaar ahaan inta u dhaxeysa Shaqaalaha iyo Isgoyska dabka ee magaalada Muqdisho, halkaas oo la sheegay inuu yaalo gaadhi nooca raaxada ah oo looga shakiyay inuu sido waxyaabaha qaraxa.
Ciidamo ka tirsan Booliiska Soomaaliya, ayaa xidhay wadadaasi kuwaas oo u diidaya gadiidka dadweynaha iyo waliba isku socodka caadiga ah.