Hargeysa (Hargeisa Press)- Madaxweynaha Jamhuuriyadda Somaliland, Muuse Biixi Cabdi,ayaa waxa uu maanta wareegto Madaxweyne uu xilkii kaga qaaday Wakiilkii Somaliland u fadhiyay dalka Itoobiya, Cumar Cali Cabdillaahi Bade.
Madaxweynaha Muuse Biixi, ayaa waxaa uu xilka Wakiilka Somaliland ee Itoobiya u magacaabay Aadan Geedi Qayaad Cabdi.
Hadaba, wareegtada Madaxweynaha, ayaa u dhignayd sidan:-
“Wareegto Madaxweyne.
Madaxweynaha Jamhuuriyadda Somaliland, Muuse Biixi Cabdi waxa uu maanta oo ay taariikhdu tahay 22/04/2024 uu wareegto Madaxweyne uu xilkii kaga qaaday wakiilkii Jamhuuriyadda Somaliland u fadhiyey dalka Itoobiya, kuna magacaabay wakiil Cusub.
Waxaanay u dhignayd Wareegtada Madaxweynuhu Sidan:-
Ujeeddo: Xil Ka-qaadis.
Ku: Cumar Cali Cabdillaahi Bade
Wakiilkii Jamhuuriyadda Somaliland ee Dalka Itoobiya.
Og: Wasiirka Wasaaradda Arrimaha Dibadda iyo Iskaashiga Caalmiga ah
Mudane, Waxaan go’aamiyey in laga bilaabo taariikhda maanta aan kaa qaado xilkii aad u haysay Qaranka. Waxaan kaaga mahad-celinayaa muddadii aad haysay Xilka Qaranka.
Ujeeddo: Magacaabid.
Markaan Arkay: Qodobka 90aad ee Dastuurka Jamhuuriyadda Somaliland;
Markaan Arkay: Aqoontiisa, Kartidiisa, iyo Waayo-aragnimadiisa;
Markaan ku Qancay: In uu Hanan Karo Masuuliyadda ka Dhalanaysa Xilkan;
Markaan Sameeyey: La-tashi;
Waxaan Go’aamiyey;
In Aadan Geeddi Qayaad Cabdi laga bilaabo taariikhda maanta uu ahaado Wakiilka Jamhuuriyadda Somaliland ee dalka Itoobiya.”
