Hargaysa (HP): Guddoomiyaha xisbiga UCID ayaa soo dhaweeyay heshiiska iyo wada hadalkii lagu soo af-jaray khilaafkii u dhaxeeyay xukuumadda Somaliland iyo Jabhadii kornayl Siciid Cawil Caarre.
Waxaanu ku bogaadiyay madaxdhaqameedkii hawshaa ka soo shaqeeyay iyo xukuumadda oo wada jir arrintaa uga wada socday iyo Cornayl Caarre oo nabad qaaday isla markaana diiday in uu cadaw ku noqdo Somaliland.
Eng. Faysal Cali Waraabe, ayaa si gaara ugu mahad naqay suldaan Maxamed Xirsi Qani iyo cidii kale ee dhamaystirka arrintaasi kala soo shaqaysay.
Guddoomiyaha UCID ayaa wax lagu farxo ku tilmaamay heshiiska nabadeed ee ay qaadatay jabhadii Caare, tallaabadaasi oo uu ku tilmaamay mid ka cadhaysiin doonta cadawga Somaliland.
“Waxaan u mahad naqayaa dadkii ka soo shaqeeyay in ay soo dhamaato arrintaa Jabhadii Caarre, oo ugu horreeyo suldaan Maxamed Xirsi Xirsi Qani ALLE Caafimaad ha siiyo iyo intii kale ee gacanta siisay ba.
Waxaanan ku hambalyaynayaa Kornayl Caarre, oo wax kasta lagu baayacay, oo diiday in uu calanka Soomaliya qaato. Dad badan oo cadaw ahi maanta way daadan doonaan”.
Geesta kale Eng. Faysal, ayaa rejo ka muujiyay waxyaabaha kale ee carqaladaha ah ee ka jira Somaliland in ay sida taas oo kale ku dhamaadaan.
“Waxaanan jecelahay waxyaabaha kale ee inoo hadhsan na in sidaas oo kale ay ku dhamaadaan. Waxa kaloo aan hambalyaynayaa dadkii Ceel-afweyn ee nabadda ka dhaliyay”.
Hargeisa Press.com/Hargaysa Office.