Maansadan Qalinkaagu yuu noqon waxaa sameeyay Suxufi Mukhtaar Caydaruus Cige (HajDhako) waxay soo baxday 27 Dec 2017 , waxaanay la hadlaysaa bahda qalinka iyo qoraalka Af kastoo ay wax ku qoraan. Waxaanay iftiiminaysaa in aanu qalinku noqon mid dhinaca qaldan loo isticmaalo ee samaha iyo wanaaga lagaga shaqeeyo. Waxaanay ku bilaabmaysaa sidan:
Qalinkaagu yuu noqon
Mid qalooca oo jaban
Mid ku qaawiyoo tusa
Quruumaha aduunyada
Qiimaha naftaadiyo
Qaabkaad u nooshahay
Qalinkaagu yuu noqon
Mid qal-qaaliyoo falan
Mid naftaada qala oo
Qoontaada muujoo
Qalbigaaga dhaawacan
Aan qarinin waayaha
Qalinkaagu yuu noqon
Mid aad qooma-mootoo
Kaba qanacdo aayaha
Qumacaad ridaysaa
Sida qaraxa baaruud
Qaribaayo dunidaba
Qalinkaagu yuu noqon
Mid aad qiil ka dhigatoo
Ku qorayso sirihii
Qubanaha dadkaagoo
Ku qasayso maatada
Qol-qol aad wadaagtaan
Qalinkaagu yuu noqon
Mid ku qaawinaayoo
Ruuxii ku qoonsada
Ama aad is qamacdaan
Qiyaamaha tusaayoo
Qancinaaya shaydaan
Qalinkaagu yuu noqon
Mid aad kuba qasaartoo
Quwadaada hoosiyo
Qarinaaya hibaduu
Qaadirkeen ku siiyee
Qaali aad ku noqon-layd
Qalinkaagu yuu noqon
Mid xiskaaga qaatoo
Qali-baaya maankoo
Quruxdiyo wanaagiyo
Kaa qariya samahaad
Qalbiyada wadaagtaan
Qalinkaagu yuu noqon
Qofka aad is jiidhaan
Ama aad is qabataan
Mid ka reeba qayrkii
Quudhsanaaya waliboo
Qalbigiisa dhaawaca
Qalinkaagu yuu noqon
Mid qod-baha furaayoo
Kala jaraya qaydkoo
Kala qubaya wadhatada
Kala qariya ehelkiyo
Intaad qoys wadaagtaan
Qalinkaagu yuu noqon
Mid aad ciil ka qaadoo
Qoorta aad is goysoo
Laabtana ku qufuloo
Qudhaadii dilaayoo
Qanjidh aad is moodaa
Qalinkaagu yuu noqon
Mid ku duula qarankiyo
Qaaradaha aduunkoo
Qorshihiisu uu yahay
Qal-cadaha ridaay iyo
Qalad inaad ku maagtaa
Qalinkaagu yuu noqon
Mid qisooyinkii hore
Soo qubaya maantoo
Soo qufaaya cadhadii
Beri hore ku qabatoo
La qandhaysan tahay wali
Qalinkaagu yuu noqon
Mid aad qaadi karinoo
Qadaf kuu horseedoo
Qalad kuu wanaajoo
Qumbulada sideedii
Qayladu is gaadhaa
Hargeisa press office