Hargeysa (Hargeisa Press)- Wasaaradda arrimaha dibedda iyo iskaashiga caalamiga ah ee Jamhuuriyadda Somaliland, ayaa hambalyo iyo bogaadin u dirtay dawladda iyo shacabka Jamhuuriyadda Jabuuti, ka dib markii Maxamuud Cali Yuusuf loo doortay Guddoomiyaha cusub ee Midowga Afrika (AU).
War-saxaafadeed rasmi ah oo ka soo baxay wasaaradda arrimaha dibedda Somaliland, ayaa lagu ammaanay guusha Djibouti, oo ay ku tilmaantay mid daliil u ah sida ay waddanku uga go’an tahay iskaashiga gobolka, iskaashiga dhinacyada badan leh, iyo horumarinta rabitaanka Afrika ee la wadaago.
“Guushan taariikhiga ah waxay ka tarjumaysaa hoggaanka Djibouti iyo sida ay uga go’an tahay horumarinta nabadda, amniga, iyo horumarka waara ee guud ahaan qaaradda Afrika,” ayaa lagu yidhi bayaanka.
Maxamuud Cali Yuusuf oo ahaa wasiirka arrimaha dibedda ee Jabuuti oo muddo dheer soo ahaa tan iyo sannadkii 2005-tii, ayaa loo doortay hoggaanka Midowga Afrika intii uu socday shirkii ka dhacay magaalada Addis Ababa ee dalka Itoobiya. Waxa uu bedelay Moussa Faki Mahamat oo u dhashay Chad, waxaana uu xilka hayn doonaa muddo afar sano ah. Guushiisa waxa ay daba socotaa tartan loo tartamo, halkaas oo uu kaga adkaaday musharixiin caan ah oo ay ka mid yihiin Ra’iisal Wasaarihii hore ee Kenya Raila Odinga iyo Wasiirkii hore ee Arrimaha Dibadda Madagascar Richard Randriamandrato.
Wasaaradda arrimaha dibadda Somaliland waxay ku nuuxnuuxsatay xidhiidhka qotoda dheer ee taariikhiga ah, dhaqanka, iyo walaalnimada ee ka dhexeeya Somaliland iyo Jabuuti. Wasaaraddu waxay muujisay kalsooni ah in hoggaanka Maxamuud Cali Yuusuf, Midowga Afrika uu sii wadi doono inuu door muhiim ah ka ciyaaro horumarinta midnimada, xasilloonida, iyo barwaaqada qaaradda oo dhan.
“Waxaan rajeyneynaa inaan sii xoojinno iskaashiga naga dhexeeya Jabuuti si aan u raadinno nabadda gobolka iyo horumarka si ay uga faa’iideystaan dadkeena,” ayaa lagu soo gabagabeeyay warsaxaafadeedka.
Hoggaanka Maxamuud Cali Yuusuf ee Midowga Afrika, ayaa ku soo beegmaya xilli xasaasi ah iyadoo Afrika ay wajaheyso caqabado kala duwan oo juqraafiyeed, dhaqaale iyo amni. Muddadiisa waxaa la filayaa in uu diiradda saaro xoojinta isdhexgalka qaaradda, xallinta khilaafaadka, iyo horumarinta danaha istaraatiijiyadeed ee Afrika ee masraxa caalamiga ah.
