Sacdiya: Haweenaydii Ugu Horraysay Ee Ku Sime Madaxweyne Ka Noqota Soomaaliya

0
410
sacdiya-haweenaydii-ugu-horraysay-ee-ku-sime-madaxweyne-ka-noqota-soomaaliya

Muqdisho (Hargeisa Press) – Guddoomiye ku xigeenka koowaad ee Aqalka Hoose ee baarlamaanka Soomaaliya, xildhibaan Sacdiya Yaasiin Xaaji Samatar, ayaa waxaa ay noqotay ku-simaha madaxweynaha Soomaaliya kadib markii uu safar debedda ah ugu kicitimay madaxweynaha Soomaaliya Xasan Sheekh Maxamuud.

Xildhibaan Sacdiya, ayaa xilkan qabanaysa maadaama uu Soomaaliya ka maqan yahay Guddoomiyaha Aqalka Hoose ee Soomaaliya Sheekh Aadan Maxamed Nuur Madoobe.

Arrintan, ayaa ah mid taariikhi ah, waana markii ugu horraysay ee Soomaaliya ay ku-sime madaxweyne ka noqoto hoggaamiye dumar ah.

Xildhibaan Sacdiya, ayaa ah haweeynaydii ugu horraysay ee loo doorto xilka guddoomiye ku xigeenka Aqalka Hoose ee baarlamaanka Soomaaliya.

Sida uu dhigayo sharciga Soomaaliya, haddii madaxweynaha iyo guddoomiyaha Aqalka Hoose ee Baarlamaanku ay isku mar safar debedda ah u wada baxaan, waxaa xilalkooda sii haynaya Guddoomiye ku xigeenka koowaad ee Aqalka Hoose.

Xildhibaan Sacdiya, ayaa sii ahaan doonta ku simaha xilalka madaxweynaha Soomaaliya iyo guddoomiyaha Golaha Shacabka inta uu Soomaaliya dib ugu soo laabanayo mid ka mida labada masuul ee ay xilalkooda sii hayso.

LEAVE A REPLY