Hargaysa (Hargeisa Press.com): Roob mahiigaan ah oo oo dabaylo watay oo galabta ka da’ay magaaladda Hargaysa ayaa khasaareyaal kala duwan soo gaadhsiiyay qaybo ka mida xaafadaha caasimadda.
Roobkan dabaysha watay ayaa sababay in dhir fara badan ay ku soo dhaceen guryo iyo gaadiid hoos yaalay dhirtaasi, kuwaaso dhibaato gaadhsiiyay gaadiidka iyo hanti kale-ba.
Waxaana roobkan ka dhashay Daadad xoog leh oo sababay in ay jaraan wadooyinka, isla markaana ku xidhay jidadka Qashin fara badan oo ay xaafadaha magaaladda ka soo qaadeen.
Sidoo kale dabayshii roobkan ayaa guryo badan jiingadda ka qaaday, halka guryo yar yar oo jiingad ka samaysnaana ay dabayshu baabiisay, halka ay jiraan Biraha anteenooyinka shirkadaha isgaadhsiinta oo guryo ku soo dul dhacay.
Ilaa hadda si cad looma oga khasaaraha dhabta ah ee ka dhashay roobkan galabta ka da’ay Hargaysa iyo tiradda dadka waxyeeladu soo gaadhay iyo sidoo kale inta uu le’eg yahay khasaaraha hantiyeed.
Iyadoo aanay weli masuuliyiinta dawladda hoose ee Hargaysa iyo kuwa Dab-demiska caasimadu wax tafaasiil ah ka bixinin waxyeeladda uu gaystay roobkaasi.
Hase yeeshee waxaa lagu arkayaa meelaha ililadaha biyuhu mareen ee magaaladda oo uu daad xoog leh marayo, kaasoo qashin aad u badan watay iyadoo ay xidhmeen gebi ahaanba jidadka magaaladda.
Roobkan xoogiisa ayaa ka da’ay degmooyinka 26-ka June, Koodbuur, ilaa xaafadaha koonfurta Hargaysa. Kaasoo socday muddo 30 daqiiqo ku dhaw. Balse dabayl xoog leh iyo dhibic weyn watay.
Wararka hor dhaca ah ee soo baxaya ayaa sheegaya in ay jiraan dad uu qaaday daadku xaafado ka tirsan degmadda Koodbuur.
Wixii warar ah ee ka soo kordha khasaaraha ka dhashay roobkaasi waxaanu idiin soo gudbin doonaa.
Hargeisa Press.com/Hargaysa Office.