Garoowe (Hargeisa Press) – Ilhaan Cumar oo ka tirsan Golaha Congress-ka Mareykanka, ayaa waxaa ay maanta booqasho ku tagtay magaalada Garoowe ee Maamul Goboleedka Soomaaliya ee Puntland.
Ilhan Cumar, ayaa waxaa garoonka diyaaradaha ee Garoowe ku soo dhaweeyay Guddoomiye ku xigeenka koowaad e Golaha Wakiillada Maamulka Puntland Cabdicasiis Cabdillaahi Cismaan oo ay wehliyaan masuulyiinta kale oo ka tirsan isla maamulkaasi.
Madaxweynaha maamul goboleedka Puntland Siciid Cabdullaahi Deni, ayaa qasriga madaxtooyada ee maamulkaasi ku qaabilay Ilhaan Cumar.
Booqashada oo weli aan si rasmi ah loo shaacin u jeedkeeda, ayaa qaadan doonta dhowr maalmood, sida ay sheegeen Maamulka Puntland. Ilhaan ayaan weli dhankeeda ka hadal booqashadeeda.
Ilhaan Cumar iyo Rashida Tlaib, ayaa sandkii 2018 noqday labadii Haweenka ahaa ee ugu horreeyey ee Muslim ah ee ku biira Aqalka Wakiilada Mareykanka.
Ilhaan Cumar, ayaa sidoo kale noqotay qofkii ugu horreeyey ee Soomaali ah ama ku dhashay Afrika oo Aqalka ka mid noqda.