Maansadan oo magaceeda la yidhaahdo ‘ALLE mahadii Weeyaan Muusaa hor kacayoo’, oo uu curiyay C/wahaab Ibraahim Cilmi (C/wahaab Oodweyne), waxay ka mid tahay sil-siladda la yidhaahdo Waa Bushaaro ILLAAHAY.
Waana wacyigelin bulshadda reer Somaliland aanu ku baraarujinayno in ay aaminaan dalkoodan calanka iyo xadka caalamiga ah leh. Xornimadda iyo dawladda qaran ee ILLAAHAY SWT ina siiyay.
Nasiibna ay u yeesheen hogaanka ugu lexejecladda badan reer Somaliland. Wadan ahaan in uu u noqdo hogaan qaran. Marka la qiimeeyo tacabkii hore ee lagu helay xornimadda iyo gooni isutaaga Somaliland iyo maanta iyo hab-maamulka dawladnimo oo haatan xisbiga Kulmiye talladiisa hayo.
Madaxweyne Muuse Biixi Cabdi-na, hogaanka dalka hayo. Waa arrin u baahan qiimeeynteedda iyo tixgelinteedda xiligan maanta lagu jiro. Talla-na ay wadaagaan halyayo badan oo reer Somaliland oo ah madaxda dhaqanka iyo kuwa diintaba.
Inagoo ka duulayna tacabka badan ee madaxweynuhu uu galay mudadan uu talladda hayay, ee aqoonsi raadinta Somaliland waxaanu ugu bushaaraynaynaa bulshadda reer Somaliland oo aanu leenahay, madaxweyne bushaaro, madaxda qaranka-na bushaaro. Shacabka mudan ee reer Somaliland-na bushaaro.
Mudadan uu xilka hayo madaxweyne Muuse Biixi, waxaynu helaynaa oo bushaaro ah, wixii keliyahaa ee inaga dhinaa qaran ahaa, oo ah aqoonsi caalami ah. waxaynu geli doonaa marxalad badhaadhe ah iyo horumar balaadhan, oo aan leeyahay waa bushaaro ILLAAHAY. Dadkaygoow bil khayr dheha.
Walaaleyaal maansadani waxay ka hadlaysaa wakhtiyo aynu soo marnay iyo xaalado jiray iyo wakhtigan aynu ku jirno iyo xaalado la geli doono iyo wixii aynu kasban doono. Waxay tilmaamaysaa waxa inoo wanaagsan iyo waxa inagu xun labadaba.
Hadaba anigoo bulshadda reer Somaliland dhamaantoodba ku hambalyaynaya walaalnimadda iyo is-fahamka iyo qaranimadda ay ku midaysan yihiin, waxaan kula talin lahaa in aynu ku darno ilaalinta sharafta iyo ku dhaqanka kala danbaynta aasaasiga ah, oo diinteenuba inoo cadaysay in aynu adeecno cida hogaanka ama madaxda inoo ah, heer kastaba ha ahaatee.
Waxaan ku soo gebagebaynayaa hor-dhacaygan milgaheenu waa midnimo, maamuuskeenuna waa walaalnimo markaynu nahay bulshadda reer Somaliland waa in aynu ka dheeraano qabiilka iyo qabyaaladda u daran mustaqbalka ummada.
Bal u fiirso tuducan murtidda ah. ‘dad qabiil hawaystaa, wanaag uma hiloobaan, qaranimadu waa haybad iyo sharaf ku heensaysan’.
Maansadiina waxay ku bilaabmaysaa sidan:
Hawlaha aduunyadu
Way is daba higsanayaan
Kolba heer ha joogtee
Ma dhamaato hibashadu
Naafo hoonbinaysiyo
Hooyo currado wayday
Aabbo hannadadiisii
Ka gob-lamoo hawaarsaday
Haween aan Asaydiyo
Hin-gaftiiba weli dhigin
Hawl iyo dhib badan baa
Lagu helay xornimadee
Hubsiimadu hal weeyee
Dadkaygoow ha moogaan
Wixii horee ku soo maray.
Hankeenu waa Somaliland
Haybadeena qaran-nimo
ALLE mahadii weeyoo
Muusaa hor kacayoo
Ma hun-gowdo daacadi
Waynu heli aqoonsiga.
Hoodiyo ayaan iyo
Gobanimadu waa hiil
Hibo ILLAAHAY keeniyo
Qaran-nimadu waa hogol
Hadda lama huraan iyo
Dawladnimadu waa hodan
Calankaa hal-danayiyo
Nabaduna hadh weeyaan
Hogaan lagu kal-soon yoo
Dadku ay hibaysteen
Intaasoo is-haysaa
Lagu helay midnimadee
Guushii waynu hananee
Dadkaygoow ha moogaan
Aynu horumar gaadhnee.
Hankeenu waa Somaliland
Haybadeena qaran-nimo
ALLE mahadii weeyoo
Muusaa hor kacayoo
Ma hun-gawdo daacadi
Waynu heli aqoonsiga.
Bello kugu hab tidhi iyo
Waa habaar samaawiya
Bulsho hayb wadaagtoo
Hubka la isku laayiyo
Hooto iyo gaashaan
Warmaha isu haystoo
Habar-habar u kala baxay
Qaarba qaar ay heereen
Intay qabiil hagoogteen
Haybtu waxay difaacdaa
Hadimadda kuwii dhigay.
Hub-siimadu hal weeyoo
Dadkaygoow ha moogaan
Yay ku hodin qabyaaladi
Hankeenu waa Somaliland.
Haybadeena qaran-nimo
ALLE mahadii weeyoo
Habeen dhalad nasiib li’yo
Muusaa hor kacayoo
Ma hun-gawdo daacadi
Waynu heli aqoonsiga.
Haybadii suldaan iyo
Nin heensaystay boqornimo
Kornayl sahanka haystiyo
Hogaan iyo siyaasiba
Himiladay lahaayeen
Hanti kuwa ku doorsaday
Shisheeye ay han-baystaan
U hamuumay kabo-qaad
Heeryadii gumaysiga
Haatan kuwaa dan mooday
Mar labaad halmaamoow
Ima hodo nin sooreed.
Hubsiimadu hal weeyoo
Dadkaygoow ha moogaan
Wixii horee ku soo maray
Hankeenu waa Somaliland
Haybadeena qaran-nimo
ALLE mahadii weeyoo
Habeen dhalad nasiib li’yo
Muusaa hor kacayoo
Ma hun-gawdo daacadi
Waynu heli aqoonsiga.
Nabsi waa hawaa’iye
Adigoo harraad qaba
Hodan-nimo ku deeqdiyo
Nimco lama harraatiyo
Hiyi nimaad wadaagtaan
Hoona aad ku leedahay
Iyo horar ku cunayana
Kumaa huran-tidaadda ah?
Kii ku heeray boqonkeed
Adna haanka goysiyo
Ma uu hadhin dad qaadkii
Hidaheena cuni jiray.
Dadkaygoow ha moogaan
Wixii horee ku soo maray
Hankeenu waa Somaliland
Haybadeena qaran-nimo
ALLE mahadii weeyoo
Habeen dhalad nasiib li’yo
Muusaa hor kacayoo
Ma hun-gawdo daacadi
Waynu heli aqoonsiga.
Dhamaad.