Maamulaha Shirkadaha Dahabshiil oo Ka Qayb-galay Shirka Sugnaanta Cunnada-Adduunka Ee UK

0
1010

London (Hargeisa Press)- Maamulaha guud ee Shirkadaha Dahabshiil Group Cabdirashiid Maxamed Siciid Ducaale, ayaa dalka UK kaga qayb galay Shirweynihii Sugnaanta Cunnada Adduunka ee 2023 oo dhawaan lagu soo gabo-gabeeyay dalka Ingiriiska.

Cabdirashiid Ducaale oo u warramayay Barnaamijka Diirada Afrika ee BBC-da oo ka hadlayay Shirweynihii Sugnaanta Cunnada Adduunka ee 2023, ayaa sheegay in shirweynaha diiradda lagu saaray dhibaatada sugnaanta cunnada ee caalamiga ah iyo sidii gacan looga gaysan lahaa kor u qaadida dadaallada lagu soo afjarayo nafaqo-xumada

“Shirkii Sugnaanta Cunnada Adduunka oo dhacay 20-kii November 2023 diiradda lagu saaray dareenka caalamiga ah ee sii xumaanaya dhibaatada sugnaanta cunnada ee caalamiga ah iyo in gacan laga geysto kor u qaadida dadaallada lagu soo afjarida nafaqo-xumada.” ayuu yidhi Maamulaha guud ee Shirkadaha Dahabshiil Group.

Wuxuu intaas ku daray in gaajo ay saameysay ku dhawaad ​​1 Bilyan oo qof oo ku nool daafaha caalamka, nidaamka cunnada adduunkana uu wajahayo caqabado aan hore loo arag, islamarkaana isbeddelka cimilada iyo cimilada aadka u daran, iyo cayayaannada iyo cudurrada la xidhiidha, ay hoos u dhigeen wax-soo-saarka dalagga, iyo macaluusha iyo colaadaha dalalka cuntada soo saara sida Ukraine, Ruushka, iyo kuwa kale.

Hase yeeshee, Sayniska iyo tignoolajiyada nidaamyada cuntada, ayaa awood u leh in ay furaan koboc la taaban karo oo ka jira Koonfurta Adduunka, yaraynta qiimaha cuntada adduunka, wax ka qabashada gaajada, oo awood u siinaya cuntooyin caafimaad leh. Waxa kale oo lagama maarmaan u ah wax ka qabashada isbeddelka cimilada iyo luminta dabeecadda.

Maamulaha Shirkadaha Dahabshiil Group, ayaa waxaa kale oo uu ka waramay doorka ay Shirkadda Dahabshiil ka qaadato taageerada ay siiso dadka Soomaalida ee dhanka  ganacsiga, isagoona Dadka Soomaalida ugu baaqay in ay abuuraan habab cusub oo wax-soo-saar cunto ah.

“Shirkadda Dahabshiil waxa ay door muhiim ah ka ciyaartaa awood siinta dadka afka Soomaaliga ku hadla iyada oo samaysay hay’ado dhaqaale yar oo ka caawiya ganacsatada yaryar si ay u dhistaan ​​maqaamkooda ganacsi, dhinaca kalena waxa ay ka taageertay tamar jaban oo ay ganacsiyadu ku gaadhaan bulshada reer miyiga ah qiimo jaban, alaabta tamarta nadiifka ah iyo adeegyada. Dadka ku hadla af-Soomaaliga waa in ay abuuraan habab cusub oo wax-soo-saar cunto ah sida kalluumeysiga si wax looga qabto loogana hortago macluusha 2022-ka ee xaalufisay xoolihii iyo cimilo-xumo ba’an oo hadda dalka ka jirta”, ayuu yidhi Cabdirashiid Ducaale.

Cabdirashiid Ducaale oo hadalkiisa sii wata, ayaa intaa ku daray in Ra’iisl Wasaaraha Ingiriiska Rishi Sunak uu ku dhawaaqay lacag dhan 100 Milyan oo Giniga Istarliinka ah (ku dhawaad ​​125 Milyan oo Doollarka Mareykanka ah) oo loogu talagalay mashaariicda horumarineed ee Soomaaliya, kuwaas oo isugu jira kaabayaasha dhaqaalaha iyo horumarinta beeraha.

Shirka Sugidda Cunnada Adduunka oo ay si wada jir ah u soo qaban qaabiyeen UK iyo Imaaraadka, ayaa waxaa ka soo qeyb galay wakiilo ka kala socday in ka badan 20 dal, iyadoo ujeedadu tahay in laga wadahadlo sidii loo xoojin lahaa dadaallada lagu gaadhayo soo afjarida gaajada.

LEAVE A REPLY

Please enter your comment!
Please enter your name here