Hargeysa, (HargeisaPress) — Alle ha u Naxariistee Marxuum Xuseen Maxamuud Cawaale (Gacmadheere), oo ka mid ahaa ganacsatada xoolaha dhoofisa ayaa caawa u dhintay rasaas uu ku riday askari ilaalinayay bar kaantarool oo ku taala tuulada Qoton.
Marxuumka oo ka mid ahaa wafti uu hogaaminayay Wasiirka Caafimaadka jamhuuriyadda Somaliland Dr. Saleebaan Ciise Axmed ayaa la sheegayaa in gaadhigii ay la socdeen oo ka dambeeyay waftigaasi uu rasaas ku furay askarigu halkaas uu ku qudh baxay rabbi naxariistii janno ha ka waraabiyee Marxuum Xuseen Maxamuud Cawaale (Gacmadheere).
Dadka ka hadlay geerida Marxuumka waxa ka mid ahaa Wasiirka Shaqada Dr Cabdi Awdaahir Cali Oo sheegay in Marxuumka gacan ka xaq darani dishay “ Waxa galabta gacan ka xaqdaran xabad ku dhufatay oo geeriyooday alle ha u naxariistee ganacsadihii weynaa ee Reer Somaliland Xuseen maxamoud Cawaale (Gacmadheere) Ilaahay naxariistii Jano ha ka waraabiyo Qaranka Somaaliland, eheladiisa, iyo Qaraabadiisa ilaahay Samir iyo Iman ha ka siiyo. Wuxuu ahaa oday weyn oo ka baxay dalka oo ka Soo qaybqaatay marxaladihii kala duwanaa ee dalku Soo maray. Mid halgan , mid dibudhis iyo mid houmarinba . geeridu waa xaq. Waxaan tacsi udirayaa ehelkii, qaraabadii iyo qarankaba. Ilaahay marxuumkana ha ka waraabiyo janadii farduusa”, ayuu Wasiir Cabdi Awdaahir Sheegay
Dhanka kale Madaxweynaha Somaliland ayaa Tacsi u diray Ehelka, qaraabada iyo shacbiga Somaliland ee uu ka baxay Marxuum Gacmadheere “Madaxweynaha Jamhuuriyada Somaliland, Mudane, Axmed Maxamed Silaanyo waxa uu tacsi u dirayaa, Qoyskii, Ehelkii, Qaraabadii, Asxaabtii iyo Shacbiga Somaliland ee uu ka baxay Alle ha u naxariitee Marxuum Xuseen Maxamuud Cawaale (Gacmadheere) oo ku geeriyooday Maanta 22/03/2015, gobolka daadmadheedh, kana mid ahaa Odayaashii ka soo shaqeeyey nabadayntii iyo dib u dhiskii dalka, sidoo kalena ka mid ahaa ganacsatada dalka ee xoolaha dhoofiya.
Madaxweynuhu marxuumka waxa uu Alle uga baryayaa inuu naxariistii jannatu fardawsa ka waraabiyo, Qoyskii, Eheladii, Qaraabadii, Asxaabtii iyo shacbiga Somaliland ee uu ka baxayna Samir iyo iimaan saadiqa ka siiyo.” Ayuu Yidhi Madaxweynuhu
Gudoomiyaha Aqalka Wakiilada iyo Waddani Cabdiraxmaan Cirro, ayaa sidoo kale ka hadlay Geerida Ganacsade Gacmo Dheere “Illaahay ha u naxariisto Marxuum Ganacsade Xuseen Maxamuud Cawaale (Gacmadheere)Ehelkiisii, Qaraabadiisii, Asxaabtiisii & Shacabka Somalilandba Ilaahay Samir & Iimaan haka siiyo, Marxuumkana Illaahay ha siiyo Dembi-dhaaf & Janatulfirdowsa. Aamiin.”
HargeisaPress News Desk — Hargeysa
hargeisapress@gmail.com