Washington (Hargeisa Press)- Wakiilka Somaliland u fadhiya dalalka Mareykanka iyo Canada, Ambassador Bashiir Good, ayaa waxaa uu jawaab kulul ka bixiyay warqadii Madaxweynaha Soomaaliya uu Mareykanka ugu bandhigay inuu ku wareejiyo dekedo ay ka mid tahay marsada caalamiga ah ee Berbera.
War qoraal ah oo lagu baahiyay bogga xafiiska Danjire Bashiir Good ee X(Twitter), ayaa waxaa lagu sheegay in Ficilka Soomaaliya ee ah in dal saddexaad u hibbeeyo dhul dal kale leeyahay, waddan kale ay tahay arrin aan xitaa lagu gudbin karin filim, isla-markaana ay tahay wax lagu qoslo.
Sidoo kale, warka qoraalka ah, ayaa lagu sheegay in Madaxweynaha Mareykanka Donald Trump uu si fudud u fahmi karo khiyaanadan oo kale, taas oo meel ka dhac ku ah isaga iyo shacabka Mareykankaba.
Wakiilka Somaliland u fadhiya dalalka Mareykanka iyo Canada, ayaa waxaa uu cadeeyay in Somaliland iyo Mareykanku hore uga wadahadleen sidii Washington uga faa’iidaysan lahayd magaalada Berebera.
Waxaa uu sidoo kale sheegay in ay Somaliland si joogto ah ula shaqaynayso Mareykanka si loo xoojiyo danaha istiraatiijiyadeed ee ay wadaagaan, gaar ahaan gobolka istiraatiijiga ah ee Badda Cas iyo Gacanka Cadmeed.
Hoos ka akhriso bayaanka
“Jamhuuriyadda Somaliland waxay si adag u daadifaynaysaa dalabka sharci-darrada ah ee Soomaaliya ugu soo bandhigtay Mareykanka inay ku wareejiso maamulka dekedda Berbera.
Somaliland waxay si joogto ah ula shaqaynaysaa Mareykanka si loo xoojiyo danaha istiraatiijiyadeed ee ay wadaagaan, gaar ahaan gobolka istiraatiijiga ah ee Badda Cas iyo Gacanka Cadmeed.
Somaliland waxay ku soo dhaweysay dalkeeda weftiyo ka socda AFRICOM si ay u qiimeeyaan sida ugu wanaagsan ee Mareykanku uga faa’iidaysan karo dekedda Berbera, si loo xoojiyo howlgalka ciidamada ee Geeska Afrika.
Somaliland iyo Mareykanku waxay hore uga wadahadleen sidii Washington uga faa’iidaysan lahayd magaalada Berebera.
Sida ku cad sharciga difaaca qaranka ee Mareykanka (NDAA 2023), Wasiirrada Arrimaha Dibedda iyo Difaaca ee Mareykanka waxaa xeerkaasi ku waajibiyey in ay si joogto ah Congress-ka ugu soo gudbiyaan warbixinnada ku wajahan xoojinta xidhiidhka difaaca, diblomaasiyadda, iyo horumarka ee Somaliland iyo Mareykanka.
Ficilka Soomaaliya ee ah in dal saddexaad u hibbeeyo dhul dal kale leeyahay waddan kale waa arrin aan xitaa lagu gudbin karin filim, waana wax lagu qoslo.
Madaxweyne Donald Trump-na wuxuu si fudud u fahmi karaa khiyaamadan oo kale, taas oo meel ka dhac ku ah isaga iyo shacabka Mareykankaba.”