Hargeysa ,(HargeisaPress) —Wasiirka Wasaaradda Xannaanada Xoolaha iyo Kalluumaysiga Somaliland Md. Xasan Maxamed Cabdi (Gaafaadhi) ayaa ayaan darro ku sifeeyey hannaankii uu Boqor Cismaan Aw Maxamuud (Buurmadow) uga hadlay dilkii dhawaan loo geystay laba sarkaal oo ka tirsanaa Ciidammada Booliska iyo Asluubta.
Wasiir Xasan Gaafaadhi oo maanta u warramay Warbaahinta ayaa sheegay in Boqor Buurmadow aanu xisaabtamin markii uu ka hadlayey dilkii labada taliye , waxaanu xusay in dilkaasi ahaa mid fool xun oo aan hore uga dhicin dalka isla markaana aan qabanin qaranka Somaliland.
Wasiirku wuxuu tacsiyeeyey qoysaskii dhibaatadu ka soo gaadhay dilkaas foosha xun.
Wasiirka Xannaanada Xoolaha iyo Kalluumaysigu wuxuu naqdiyey qaar ka mid ah siyaasiyiin isku tilmaama heer qaran oo haddana si reeraysan uga hadlay dhibaatadaas. Wasiir Xasan Gaafaadhi wuxuu siyaasiyiintaas ku eedeeyey inay Kitaab beeleed qoorta sudheen.