Hargeysa, (HargeisaPress) —Xukuumada Somaliland ayaa la safatay wakiilkii Qaramadda Midoobay u qaabilsana Soomaaliya Nichlos Haysom ee soomaaliya ka caydhisay dalkeedda.
Xukuumaddu waxay ku amaantay wakiilka Un-ta u qaabisan Soomaaliya in uu dadaal u galay nabadeynta Soomaaliya iyo xal u helida khilaafyadda Somaliland iyo Soomaaliya u dhexeeya.
“Dawlada Somaliland waxay u cadaynaysa xoghayaha guud ee Qaramada Midoobay iyo beesha caalamka intaba in ay ka xun tahay go’aanka Somalia ka qaadatay Wakiilka xoghayaha guud ee UN-ta mudane Nicholas Haysom.”ayaa lagu yidhi qoraal ka soo baxay wasaaradda arrimaha dibada Somaliland.
War-saxaafadeedkan waxa uu u qornaa sidan “Dawlada Jamhuuriyada Somaliland iyadoo tixgelinaysa iskaashiga iyo taageerada dhanka horumarka iyo bani’aadamnimada ee ka dhaxeeya Somaliland iyo Jimciyada Quruumaha ka dhaxaysa waxay ku war-galinaysaa Xoghayaha Guud ee Qaramada Midoobay in go’aankaasi aanu khusayn Somaliland, isla markaana ay dawladda Somaliland si buuxda ula shaqaynayso Jimciyada quruumaha ka dhexaysa iyo laamaheeda kala duwan.
Dawlada Somaliland waxay ku bogaadinaysaa Wakiilka Xoghayaha Guud ee Qaramada Midoobay Mudane Nicholas Hayson in uu mudadii uu joogay xafiiska uu dedaal xoog leh u galay nabadaynta Somalia dhexdeeda iyo xal-uraadinta khilaafka Somaliland iyo Somalia.
Ugu dambayn, dawladda Jamhuuriyadda Somaliland waxay aaminsantahay in go’aankan ka dhanka ah Wakiilka Xoghayaha Guud ee Qaramada Midoobay uu ka xeel dheer yahay waxa lagu sababeeyay, isla markaana uu ka dhalan karo cawaaqib xumo mustaqbalka.
HargeisaPress News Desk- Hargeysa