Wuxu yidhi IHN Cige Aw Cali “Adigiyo Cabdiba waxad tihiin ciriro waawayne, beel caafimaad seexataad caabuq gelisaane ….”
Waxan qabaa inay badanyihiin dadka abuuraya caabuqa iyo xumaanta, markaa waxan goostay bal inaan si too ah iyo si falsafad ahba dadka wax ugu sheego, dadkana ku dhiiriyo wanaaga, cibaadada iyo iscafinta.
Saaxiibkay Maxamud Adan Jaamac Galaal oo tix uu tirayay ay igu dhalisay fekerkan ayaan xoog u salaamayaa.
Ilaahay SWT ha inoo aqbalo ducadan, idina ku darsada oo dalka iyo dadkaba inoogu duceeya!!!
ISCAFIYA:
In cagaagu daranyahay nin caraancar maray baa og
In colaadu kulushahay nimuu cadow haleelaa og
Caafimaad wanaagiisna ninkii cudur la tiicaa og
Inuu daynku culusyaha ninkii lagu canaantaa og
In caruusku sharaf yahay ninkii loo camiraybaa og
Afartaa ma cayntaarinine cagaha maw joojay
Ma u diiday weedh ceebleh oo lagu cambaaroobo
Ma ciseeyay gabaygaad na tidhi calana maw taagay
Ma casuumay erayada cuddoon caynka maw jiiday
Ma cabbiray halkaan doonayay mana calaameeyay
Ma cashariyay ruuxii af-xumo igula ciir-ciiray
Afartaa ma cayntaarinine cagaha maw joojay
Cibaadada ninkii diida baa camalka shaydaan leh
Cadaab inuu mutaystiyo ciqaab caadilkaw qoraye
Cirka haadka duuliyo dhammaan kii carriga jooga
Inay calaf u simanyiin iyaba waa cibro adduune
Ceerriga badaa laga gurtaa duunyo kala cayna ah
Cambar nibiri kii hela iyo kii qori u soo caaryo
Midba calafka loo qoray ayuu kala carraabaaye
Afartaa ma cayntaarinine cagaha maw joojay
Caloolyowga dunidaa leh oo subaxba waa cayne
Midna way cajebisaa beryuu calan-waleeyaaye
Midna way ku ciirtaa ifkaa lagu ciqaabaaye
Labadaa rabbaa kala cugtoo caynku rabo yeela
Afartaa ma cayntaarinine cagaha maw joojay
Intaan ciida laynagu afrogin camalka aan badino
Dalka aan u wada ciidanee cadho la’aan taliya
Caroogii wanaagana tumoo ceeb inaga moosa
Cadli fala ciilkana ka kora qaran cunfi la’a taaga
Iscafiya calooshana ka jara xumo dhamaantiinba
Prof. Adam Ismail (aadanwali)