London (Hargeisa Press) – Wefdi balaadhan oo ka socda dowladda Somaliland oo maalmihii u danbeeyay ku sugnaa dalka Ingiriiska, ayaa kulan la yeeshay masuuliyiin sar sare oo ka tirsan dowladda UK.
Wefdigan ka socda dowladda Somaliland oo uu hoggaaminayo Wasiirka arrimaha dibedda Dr. Ciise Keyd Maxamuud, ayaa waxaa ku wehelinayay La-taliyaha Hay’addaha ee Madaxweynaha Somaliland Jaamac Muuse Jaamac, Wasiir xigeenka wasaarada Ganacsiga iyo Guddoomiyaha hay’adda Tayadda.
Sidoo kale, wefdigan ka socda dowladda Somaliland, ayaa waxaa ay kulan balaadhan ay la yeesheen xafiiska ra’iisal wasaaraha dowladda UK Boris Johnson.
Kulankan, ayaa waxaa ay labada dhinac ay kaga wadahadleen danaha labada dowladood ee Somaliland iyo UK, sida uu bartiisa Twitter ku baahiyay Wasiirka arrimaha dibedda Somaliland Dr. Ciise Keyd.
Another day of constructive meetings in the UK. Today @JamaMusse and I met with Senior Officials from the Prime Ministers office. I would like thank Sir. @GavinWilliamson and @TomTugendhat the Chairman of the Foreign Affairs Committee of the @HouseofCommons for all their support. pic.twitter.com/U2SiGxtSJa
— Dr Essa Kayd (@DrEssaKayd) May 20, 2022
Wasiirka arrimaha dibedda Somaliland Dr. Ciise Keyd, ayaa bogaadiyay Xildhibaan Gavin williamson iyo Guddoomiyaha Guddiga Arrimaha Dibedda ee dalka UK Tom Tugendhat oo kaalin ka qaatay qabsoomida kulanka.
Dhinaca kale, wefdiga uu hogaaminayo Wasiirka arrimaha dibedda Somaliland Dr. Ciise Keyd, ayaa jaaliyada Somaliland ee ku dhaqan dalka Ingiriiska kala qeyb-galay xuska dabaaldega 31 guurada maalinta qaranimada Somaliland ee 18 May, iyada oo munaasibada xuska ay sidoo kale ka soo qeybgaleen xildhibaano ka tirsan baarlamaanka Ingiriiska.