Hargeysa (Hargeisa Press)- Waxaa maanta magaalada Hargeysa ee caasimada dalka Somaliland laga xusay sannad-guurada 113aad ee ka soo wareegtay markii ay Taiwan madax-bannaanideeda kala soo noqotay dalka Shiinaha.
Munaasibada xuska oo ay soo qaban qaabisey Safaaradda dalka Taiwan ay ku leedahay Somaliland, ayaa waxaa ka qayb galay Wasiiro ka tirsan Xukuumadda Somaliland, Safiiradda Somaliland iyo Taiwan, Xildhibaanada Baarlamaanka, aqoonyahan iyo diblomaasiyiin.
Safiirka Taiwan u fadhiya dalka Somaliland Allen C, Lou, ayaa ka waramay ahmiyada ay maalintani u leedahay qaranka iyo shacbiga dalka Taiwan.
Wuxuuna si qoto dheer uga waramay halgankii dheeraa ee ay dowladda Taiwan u soo martay dimuqraadiyadda, isagoona sheegay in Taiwan ay ku naalooneyso nabad iyo horumar waara, taasi oo ku salaysan buu yidhi dimuqraadiyad.
Sidoo kale, Safiirka, ayaa waxaa kale oo uu ka hadlay iskaashiga labada dowladood ee Somaliland iyo Taiwan oo uu sheegay in mashaariic kala duwan ay Taiwan ka hirgelisay Somaliland.
Ambassador Allen, ayaa sheegay in xidhiidhka labada dowladood ee Somaliland iyo Taiwan uu jiri doono oo uu waari doono, isla-markaana uu marba marka ka dambeysa uu sii xoogeysanayo.
Wasiirka wasaaradda arrimaha dibedda Somaliland Dr. Ciise Keyd Maxamuud oo isna khudbad ka jeediyay munaasibada, ayaa ugu horayn dhambaal boggaadin ah u diray dowladda iyo shacbiga dalka Taiwan.
Waxaanu wasiirku dowladda iyo shacbiga dalka Taiwan uu ku boggaadiyay qaranimada 113aad jirsatay ee ka soo wareegtay markii ay xoriyadooda la soo noqdeen oo maanta ku beegnayd.
Wasiirka, ayaa waxaa uu sheegay in maanta aan loo debaal-degayn in ay dowladda Taiwan tahay dowlad adkaysi iyo dimuqraadiyad ay ka hanaqaaday oo keliya.
Hase yeeshee wuxuu wasiirku sheegay in loo debaal-degayo xidhiidhka xoogeystay ee ka dhexeeya labada dowladood ee Somaliland iyo Taiwan, kaasi oo ku dhisan buu yidhi qiimeyn iyo qadarin.
Wuxuu xusay in xidhiidhka labada dowladood uu dhaxal siiyay in ay ka wadashaqeeyaan waxyaabo badan oo ay dantoodu ku jirto.
Geestooda, waxa iyaguna munaasibada xuska hadalo ka jeediyay masuuliyiintii kala duwanaa ee xukuumadda Somaliland, Safiiradda, Xildhibaanada, Aqoonyahanka iyo Dublamaasiyiinta.
Waxaanay shacabka dalka Taiwan ku hambalyeeyeen xuska sannad-guurada 113aad ee ka soo wareegtay markii ay xoriyadooda kala soo noqdeen dalka Shiinaha.
Masuuliyiinta, ayaa sidoo kale waxaa ay si qoto dheer uga warameen xidhiidhka taariikhiga ah ee ka dhexeeya dowladdaha Somaliland iyo Taiwan iyo marxaladihii uu soo maray.
Ugu dambayntii, waxaa munaasibada xuska lagu soo bandhigay wax soo saarka dhanka dalaga Beeraha ee ay Taiwan ka samaysay Somaliland iyo sida uu u midho dhalay.
