Hargeysa (Hargeisa Press)- Waxaa maanta goobta qalin-jabinta ee Jaamacadda Hargeysa, lagu qabtay Barnaamij ah soo-dhaweynta Ardayda cusub ee Jaamacadda Hargeysa, oo ujeeddadiisuna ahayd in lagu dhiirrigeliyo ardayda cusub loona diyaariyo sees adag oo ay ku dhistaan safarkooda aqooneed.
Munaasabaddan, ayaa ahayd mid ay si wadajir ah u diyaariyeen Guddida qorista ardayda cusub iyo xafiiska xidhiidhadda Jamaacadda, iyadoo lagu bixiyay talooyin qiimo leh iyo hagitaan ku saabsan sida ardaydu ugu guulaysan karaan dhinacyada tacliinta iyo nolosha Jaamacadda.
Barnaamijku waxa uu ku bilaabmay Sheekh Cumar Bade Adam, oo ah Hormoodka Kulliyadda Culuumta Islaamka iyo Afka Carabiga, oo jeediyay khudbad ku saabsan muhiimadda edaabta iyo akhlaaqda.
Wuxuu ku booriyay ardayda inay ku dhaqmaan anshax wanaagsan gudaha iyo dibadda jaamacadda, islamarkaana ay ku camal-falaan mabaadi’da Islaamka oo ay noloshooda ka dhigtaan hagitaan joogto ah. Hadalladiisa qalbiga ka soo go’ay waxay xasuusinayeen ardayda in edaabta iyo akhlaaqdu ay u muhiim yihiin sida aqoonta u tahay in ay u dhisaan mustaqbalkooda.
Waxaa ku raacay hadalkaas Mr. Ismaaciil Yuusuf Xasan, Agaasimaha Arrimaha Ardayda, oo tilmaamay muhiimadda ay leedahay in ardaydu ilaaliyaan anshaxa gudaha iyo dibadda jaamacadda. Wuxuu xasuusiyay ardayda in akhlaaqdooda ay matasho qiimahooda shaqsiyeed iyo sumcadda Jaamacadda Hargeysa.
Sidoo kale, wuxuu ku booriyay inay fahmaan fursadda ay heleen ee ah in lagu soo dhaweeyo mid ka mid ah jaamacadaha ugu wanaagsan Somaliland, isagoo ku dhiirrigeliyay inay fursaddan uga faa’iidaystaan inay muujiyaan mas’uuliyad. Khudbaddiisu waxay xoojisay fikradda ah in ilaalinta anshaxa sare iyo dadaalka waxbarasho ay waddo fiican u tahay guusha tacliinta iyo kobaca shakhsiyadeed.
Intaa ka dib, Mr. Mustafe Suudi Cabdi, oo ah Diiwaanhayaha Jaamacadda, ayaa si faahfaahsan u sharaxay habka diiwaangelinta, isagoo ku adkeeyay ardayda inay nidaam wanaagsan yeeshaan, xilliyada loogu talagalayna ka fogaadaan dib-u-dhac.
Cabdillaahi Cabdikariim Cabdillaahi, Agaasimaha Maaliyadda iyo Qorsheynta, ayaa isna sharaxay nidaamka bixinta khidmadaha waxbarashada, isagoo ku adkeeyay muhiimadda ay leedahay in la bixiyo lacagaha wakhtiga loogu talagalay si looga fogaado caqabadaha waxbarashadda.
Khudbadaha labadan masuul waxay ka turjumayeen muhiimadda ay leedahay mas’uuliyadda ardayda ee dhinacyada tacliinta iyo qorsheynta maaliyadeed, iyagoo ku dhiirrigeliyay inay si firfircoon oo aan carqalad lahayn u wataan safarkooda jaamacadeed.
Barnaamijkan wacyigelinta iyo hagidda ahi wuxuu sidoo kale ku dhiirrigeliyay ardayda inay ka faa’iidaystaan fursadaha kala duwan ee jaamacadda, oo ayna ku ekaynin waxbarashada oo keliya.
Axmed Maxamed Shirwac, Agaasimaha Horumarinta Barnaamijyada Tacliinta ee Jaamacaddu, wuxuu ardayda ku dhiirrigeliyay inay dadaal muujiyaan isla-markaana ay ka faa’iidaystaan kheyraadka Jaamacadda si ay u dhistaan mustaqbalkooda xirfadeed.
Dhanka kale, Agaasimaha Xidhiidhada Cali Mire, ayaa isna wuxuu ku dhiirrigeliyay ardayda inay ka qaybqaataan hawlaha ka baxsan waxbarashada si ay u muujiyaan kartidooda shakhsiyadeed iyo inay kobciyaan naftooda.
Sidoo kale, Dr. Fu’aad Cabdi Obsiiye, Guddoomiye Ku-xigeenka Tacliinta iyo Cilmi-baadhista, wuxuu carabka ku adkeeyay fursadaha qaaliga ah ee Jaamacaddu siiso ardayda, sida mashruucyada cilmi-baadhista iyo barnaamijyada bulshada, isagoo ku dhiirrigeliyay inay ka faa’iidaystaan fursadahan si ay uga dhigaan waayo-aragnimadooda jaamacadeed mid dhammaystiran.
Gunaanadkii barnaamijka, Dr. Maxamed Axmed Sulub, oo ah Madaxweynaha Jaamacadda Hargeysa, ayaa khudbad mahadnaq iyo hogatusaalayn ah u jeediyay dhammaan ka qaybgalayaasha, isagoo xusay muhiimadda ay leedahay wada shaqeynta u dhexeysa shaqaalaha iyo ardayda. Wuxuu ardayda xasuusiyay waajibaadka ay ku leeyihiin ku dhaqanka xeerarka iyo shuruucda jaamacadda.
Dr. Sulub wuxuu caddeeyay ballanqaadka jaamacadda ee ah in la abuuro deegaan waxbarasho oo taageero leh oo ay ardaydu ku horumari karaan. Wuxuu ku dhiirrigeliyay ardayda inay fursad kasta ka faa’iidaystaan, isagoo ka tagay saameyn dhiirrigelin leh oo xasuusinaysa bilowga cusub ee safarkooda aqooneed ee Jaamacadda Hargeysa.
Hoos ka daawo muuqaalka