Hargeisa (Hargeisa Press) – Alle ha u naxariistee waxaa saaka magaalada Hargeysa ee caasimada Somaliland ku geeriyooday Agaasimihii hore ee Wasaaradda Arrimaha gudaha Somaliland Cabdi Axmed Nuur (Gurey).
Marxuum Cabdi Axmed Nuur ayaa sidoo kale ahaa la-taliye sare oo arrimaha gudaha ah.
Dhinaca kale, Madaxweynaha Somaliland Muuse Biixi Cabdi ayaa ka Hadley geerida agaasimihii hore wasaarada Arimaha Gudaha Marxuum Cabdi Axmed Nuur.
Madaxweynaha ayaana qaranka Somaliland, waxgaradka, waayeelka, aqoonyahanka, qoyska, ehelada, qaraabada, asxaabta, iyo shacbiga Somaliland ka tacsiyadeeyay geerida Agaasimihii hore arimaha gudaha.
Tacsida madaxweynaha oo nuqul ka mid ahi soo gaadhay Warbaahinta Hargeisapress, ayaa u dhignayd sidan “Madaxweynaha Jamhuuriyadda Somaliland, Mudane Muuse Biixi Cabdi, isagoo ku hadlaya magaciisa, ka dawladda iyo ka shacbiga Jamhuuriyadda Somaliland, waxa uu dhambaal tacsi ah u dirayaa, waxgaradka, waayeelka, aqoonyahanka, qoyska, ehelada, qaraabada, asxaabta, iyo shacbiga Somaliland, ee uu ka baxay Alle ha u naxariistee Marxuum Cabdi Axmed Nuur (Cabdi Guray) oo ku geeriyooday saaka oo ay taariikhdu ahayd 22/03/2021 Caasimada Somaliland ee Hargeysa.
Waxaanu madaxweynuhu marxuumka ku sifeeyey oday xilkas ahaa oo ka baxay dalka iyo dadka door muhiimana ka soo qaatay nabadayntii iyo dib u dhiskii dalka, xilal kala duwana ka soo qabtay xukuumadihii kala danbeeyey.
Waxaanu madaxweynuhu marxuumka ALLE uga baryayaa inuu naxariistii janno ka waraabiyo, waxgaradka, waayeelka, aqoonyahanka, qoyska, ehelada, qaraabada, asxaabta iyo shacbiga Somaliland ee uu ka baxayna samir iyo iimaan saadiqa ka siiyo.”