Dubia (Hargeisa Press) – Dowladda Imaaraadka Carabta, ayaa maanta sheegtay inay sababo bani’aadaminimo u marti-gelisay Madaxweynihii hore ee dalka Afghanistan Ashraf Ghani kadib markii uu dalkiisa ka cararay xilli ay qabsadeen ururka Taalibaan.
Wasaaradda Arrimaha Dibedda iyo Iskaashiga Caalamiga ah ee Imaaraadka Carabta, ayaa bayaan ay soo saartay ku xaqiijisay inay dalka ku soo dhowaysay Madaxweyne Asharf Ghani iyo qoyskiisa, sababo bani’aadaminimo dartood.
Ashraf Ghani, ayaa Afghanistan ka cararay Axaddii kadib markii Taalibaan ay ku soo dhawaadeen Kabul, kahor inta aanay kooxdu soo gelin magaalada.
Dhanka kale, safiirka Afghanistan u fadhiya Tajikstan, ayaa ku eedeeyay inuu Ghani watay ku dhawaad 169 milyan oo doollar markii uu baxay Axaddii.
Wuxuu ku tilmaamay duulimaadkii Madaxweyne Ghani “khiyaano dalka iyo qarankaba uu ku sameeyay.
Danjire Mohammad Zahir Aghbar, ayaa hadalkan ka sheegay shir jaraa’id oo uu ku qabtay safaaradda Afghanistan ay ku leedahay caasimadda Tajikstan ee Dushanb.
Wuxuu kaloo ku dhawaaqay in safaaraddu damacsan tahay inay u aqoonsato ku xigeenkii hore ee Ghani Amrullah Saleh inuu noqdo ku -simaha madaxweynaha Afghanistan.