MOGADISHU. Ugu yaraan 7 qof oo 3 Askarta Dawladda ahi ku jirto ayaa ku dhintay tiro intaa ka badana way ku dhaawacantay weerar Xooggaga Al-shabaab galinkii dambe ee Jimcaha ku qaaday Hotelka Makka Al-mukarama ee Magaalada Muqdisho.
Dadka weerarka ku dhintay waxaa ku jira safiirkii Somalia u fadhiyay wadanka Switzerland Yuusuf Bare-bare. waxaa burbur xooggani soo gaadhay hotelka, sidoo kalena Korontada ayaa ka go’day, waxaana aagga hotelka xidhay Ciidamada Amaanka
Hotelkan oo caan ku ah inay joogaan Masuuliyiinta dawladda, kuna jira meelaha aadka loo ilaaliyo ayaa dablay Al-shabaab ka tirsan isku qarxiyeen kadibna koox hubaysani gudaha u gashay, iyagoo halkaasi muddo saacado ah gacanta ku hayay.
Ciidamada sida Gaarka ah u tababaran ee Somalia ayaa kadib markii ay muddo kor joogeen gudaha u galay islamarkaana sheegay inay dhamaan toogteen kooxdii weerarka gaysatay sidoo kalena ay badbaadiyeen dad halkaasi ku sugnaa.
Ururka Al-shabaab ayaa sheegtay Masuuliyadda Weerarka “Annaga ayaa ka dambeynay weerarka Makka Al-mukarama, dagaalkuna wali gudaha hotelka ayuu ka socdaa” ayuu Reuters u sheegay afhayeenka hawl galada Alshabaab Sheekh Cabdicasiis Abu Muscab intii uu socday dagaalku.
Saraakiisha hoggaaminayay howlgalka Ciidanka Somalia dib ugu qabsaday Hotelka ayaa shaaciyay inay ciidamadu soo badbaadiyeen dad isugu jira mas’uuliyiin ka tirsan dowladda Soomaaliya, ganacsato iyo siyaasiyiin hoteelka ku jiray markii ay kooxaha hubeysan qabsanayeen.
HargeisaPress News Desk — Hargeysa
hargeisapress@gmail.com
