Hargeysa (Hargeisa Press)- Xisbiga muxaafidka ah ee KULMIYE, ayaa waxaa uu saaka cuduudiisa taageero wacdaro leh astaanta guusha ku soo bandhigay fagaaraha beerta Xorriyadda Hargeysa, maalintiisii labaad ee ololaha doorashada.
Taageerayaal aan farahooda la qiyaasi karin oo ka mid ah taageerayaasha xisbiga KULMIYE ee ku dhaqan caasimadda Somaliland ee Hargeysa, ayaa saaka isu soo bax qarqiyey jidadka, suuqyada iyo xaafadaha degmooyinka magaalada oo ay sida daadadka socod ku mareen ku soo bandhigay taageerada KULMIYE.
Waxay suuqyada iyo shaaracyadoodu u eekaayeen kuwa isu rogay midabka calanka xisbiga KULMIYE ee ka kooban laba midab ee Huruudda iyo Doogga, taas oo muujisay sadaal guul cad oo xisbiga KULMIYE markale ka soo hoyn doono doorashada Madaxtooyada.
Kuwaas oo markii dambey isugu soo biyo-shubtay fagaaraha beerta xorriyadda oo markii ay buux-dhaaftay ay taageerayaashu safaf dhaadheer u galay waddooyinka kala duwan ee ku hareeraysan fagaarahaas.
Waxaanna taageerayaasha xisbiga KULMIYE isu soo baxa fagaaraha beerta Xorriyadda kala qaybgalay xubno ka mid ah Madaxda xisbiga KULMIYE, masuuliyiinta ololaha ee xisbiga ee gobolka Maroodi-jeex iyo madax kale.
Hoos ka daawo muuqaalka sawirrada
