Hargeysa, (HargeisaPress) — Maamulka, Macalimiinta iyo Ardayda Dugsiga Sare ee Sheekh Cali Ibraahim ee magaalada Hargeysa, ayaa abaalmarin Dahab ah ku maamuusay Deeqa Nuux Yoonis oo ka tirsan ardayda dugsigaas oo kaalinta koowaad tartan suugaaneed dhowaan loo qabtay Hal-abuurrada da’da yar ee Somaliland.
Munaasibadda loo qabtay abaalmarinta Dahabka ah ee la guddoonsiyey Ardayddan oo ku qabsoontay Hotel Dalxiis ee magaalada Hargeysa habeen hore, waxa ka qayb-galay Agaasimaha Guud ee Wasaaradda Dhalinyarada iyo Ciyaaraha, Guddoomiyaha Waxbarashada degmooyinka Bari ee gobolka Maroodijeex, Maamulka, Macalimiinta iyo Ardayda Dugsiga Sare ee Sheekh Cali Ibraahim.
Ugu horeyn, waxa munaasibadda ka hadlay Maamulaha Dugsiga Sare ee Sheekh Cali Ibraahim, Maxamed Axmed Cali (Jamhuuriya) oo tilmaamay sida ay dugsi ahaan ugu faraxsan yihiin guusha ay tartan Suugaaneedka ka soo hoysay Ardayad ka tirsan Dugsigooda, isaga oo abaal-marinta ay ugu talo-galeen Deeqa Nuux Yoonis tahay mid ay ku dhiiri-gelinayaan isla markaana kagala qayb-qaadanayaan guusha ay ka soo hoysay tartanka.
“Waxa aan caawa (xalay) aad ugu faraxsanahay inaynu abaal marin ay mutaysatay halkan ku gudoonsiino,faraxad ayay noo tahay iskuulka biyo Sheekh Cali Ibraahin ayay u tahay inay Ardayda ka tirsani oo illaahay hibo u siiyay Suugaantu ka soo dhexbaxdo ,iyadoo ka guulaysatay dad badan, kuna soo baxday hibada illaahay ku manaystay Deeqa yar. Deeqa Nuux Yoonis waxa ay naga mudantahay haddaanu nahay iskuulka Sheekh Cali ibraahin inaanu dhiirrigelinno oo farxaddeeda la qaybsanno,” sidaas ayuu yidhi Maamulaha Dugsiga Sare ee Sheekh Cali Ibraahim (Ex-Biyo-dhacay Sare).
Guddoomiyaha Waxbarashada degmooyinka Bari ee gobolka Maroodijeex Ismaaciil Cali (Dhubato) oo munaasibadda ka hadlay, ayaa ku dheeraaday muhiimadda ay leedahay dhiirri-gelinta ah inay da’yarta iyo Ardaydu Ebbe hibada u siiyey Hal-abuurnimadu ka qayb-qaataan tartan-sugaaneedka, isaga oo tilmaamay sida ay u yartay inay ardayda ka soo dhex-baxaan Hal-abuur ka dhex-muuqda bahda waxbarshada, isaga oo si gaar ah u xusay gabadha.
“Horta aan u ducayno Deeqa Nuux Yoonis, waan ku faraxsanahay inaan arko, gabadh da’yar oo hal-abuurad ah oo tirisa suugaan kala duwan. Wakhtiyadii hore may dhici jirin ama way ku yarayd in la arko gabadh Gabayda, waayo wakhtiyadaasi way buraan-buri jireen dumarku, malaha ogaalkayga waxan garanayaan gabadh kaliya oo wakhtigii isticmaarka gabay gobanimo doon ah tirin jirtay,waxa iigu xigtay Deeqa Nuux Yoonis oo aynu caawa (xalay) u fadhino Abaalmarintan ay mutaysatay in la guddoonsiino,” ayuu yidhi Ismaaciil Cali (Dhubato).
Agaasimaha Guud ee Wasaarada dhalinyarada iyo ciyaaraha Maxamed Dhabbeeye, ayaa sheegay inay wasaarad ahaan soo-dhawaynayaan isla markaana ay dhiiri-gelinayaan gabdho da’yar oo Eebbe ugu deeqay hibada Hal-abuurnimada. “Ka wasaarad ahaan haddii aanu nahay Wasaaradii dhalinyarada waanu ku faraxsanahay inaanu aragno dhalinyarada soo kacaysa oo Illaahy hibo u siiyay inay tirin karaan suugaan kala duwan, runtii aad ayaan ugu bogaadinaya Deeqa Nuux Yoonis inay soo bandhigto Gabayo inta badan dhalinyarada ka hadlaya,” ayuu yidhi Agaasimaha guud ee Wasaarad dhalinyarada iyo ciyaaraha Somaliland.
Daawo Muuqaal
Gabadha Munaasibadda Abaalmarinta dhiirrigelinta ah lagu guddoonsiiyey Deeqa Nuux Yoonis, oo munaasibadda ka hadashay, ayaa uga mahad-celisay Maamulka, Macalimiinta iyo Ardayda Dugsiga ay ka tirsan tahay ee Abaalmarinta ku maamuusay iyo masuuliyiintii iyo marti-sharaftii kale ee ka qayb-gashay xafladda lagu maamuusay.
Deeqa Nuux Yoonis, ayaa ah Ardayad ku jirta Sannadkii Saddexaad ee Waxbarashada Dugsiga Sare.
Intii ay munaasibaddu socotay, waxa lagu soo bandhigay riwaayad wacyigalin ah oo ka hadlaysa Tahriibka, Maansooyin dhaqanka suuban laga tiriyey, kuwaas oo ay qayb ka ahaayeen Ardayda Dugsiga Sare ee Sheekh Cali Ibraahim, taas oo aad u soo jiidatay Dadkii ka qayb-galay Xafladda.
Gunaanadkii munaasibadda, Guddoomiyaha Waxbarashada Gobolka Maroodijeex Ismaaciil Dhubato, ayaa Abaalmarinta Dahabka ah ee Maamulka Dugsigu ugu talo-galay Guddoonsiiyey Hal-abuuradda Da’da Yar ee Deeqa Nuux Yoonis oo kaalinta koowaad u gashay tartan-suugaaneed dhalinyarada Somaliland loo qabtay oo lagaga hadlayey Aafada Tahriibta iyo dhibaatada ay leedahay.