Hargaysa (HP): Golaha Guurtida Somaliland ayaa maanta ansixiyay xeerka shaqaalaha Rayidka ah ee Xeer Lanbar 31/2020-ka.
Xeerkaasi oo muddo hor yaallay golaha Guurtidda ayay goluhu ku soo sameeyeen kaabis iyo wax ka bedel.
Fadhiga maanta ee golaha Guurtida oo uu shir-gudoominaayay guddoomiye ku-xigeenka koowaad ee golahaasi Siciid Jaamac Cali, ayaa ka hor intii aan codka ansixinta loo qaadin xeerkaasi waxay warbixin ka dhegaysteen guddi loo xil saaray in ay kaabis iyo wx ka bedel ku soo sameeyaan xeerkaasi.
Guddigaasi oo uu guddoomiye u ahaa xildhibaan Jirde Siciid Maxamuud, oo golaha warbixin ka siinayay xeerkaasi ayaa sheegay in ay qodobada qaarkood wax kabedelka iyo kaabista ku soo sameeyeen.
Qodobadaasi oo ay ka mid yihiin qodobadda 1aad illaa 6aad ee xeerkaasi shaqaalaha Rayidka ah ee Somaliland.
Fadhiga maanta ee Guurtidda oo ay ka soo xaadireen 43 xildhibaan, oo ka mida 82 mudane ee uu aqalkaasi ka kooban yahay, ayaa Kadib markii ay dhamaatay warbixinta guddiga waxaa cod gacan taag ah loo qaaday ansixinta xeerkaasi.
Waxaana ogolaaday 41 xildhibaan, 1 xildhibaan ayaana diiday, cid ka aamustay na ma jirin, halka aanu gudoomiyuhuna codaynin.
Sidaas ayaanay golaha Guurtidu ku ansixiyeen xeerka shaqaalaha rayidka ah ee Somaliland Xeer Lanbar 31/2020.
Dhinaca kale, xeerka shaqaalaha rayidka ah ee Somaliland ayaa ah mid muddo dheer la sugayay ansixintiisa, isla markaana baahi weyn loo qabo dhaqan galkiisa oo si weyn loo tebayay.
Waxaana xeerkaasi hore u soo ansixiyay mudaneyaasha golaha Wakiiladda Somalialnd, isla markaana muddo hor yaallay golaha Guurtidda.
Iyadoo la filayo in ansixintan golaha Guurtidda kadib loo gudbin doono madaxweynaha Somaliland si uu saxeexa dhaqan galka ugu duugo.
Hargeisa Press.com/Hargeisa Somaliland.