Hargeysa (Hargeisa Press) – Dowladda Ingiriiska, ayaa waxaa la sheegay in ay joojisay taageeradii ay siin jirtay ciidamada Booliska Somaliland, Sida ay daabacday shabakada Somalilandchronicle.
Dowladda UK, ayaa waxaa kale oo ay dowladda Somaliland ka codsatay inay baadhitaan ku samayso eedaymaha booliska ee ka dhashay mudaharaadkii Mucaaridku hoggaaminayay ee magaalada Hargeysa ka dhacay Khamiistii 9-kii June 2022.
“Saaxiibada caalamiga ah ee raacaya geeddi-socodka dimuqraadiyadda Somaliland waxay aad uga walaacsan yihiin mudaharaadyadii rabshadaha watay ee siyaasadeed ee ka dhacay Hargeysa. Waxaan ku baaqaynaa in la xakameeyo dhammaan dhinacyada si xaaladda loo dejiyo, loogana hortago waxyeellada & dhaawaca” ayaa lagu yidhi war-saxaafadeed ay dowladda Uk soo saartay.
“Dowladda UK waxay hakisay taageeradii hawleed ee ay siin jirtay ciidamada booliska Somaliland iyo ciidamada ka hortagga argagixisada ee loo yaqaanno RRU-da.”ayaa intaa la sii raaciyay war-saxaafadeedka.
Lama oga saamaynta ay arrintani ku yeelan karto joojinta taageerada dowladda UK ee Somaliland iyadoo Somaliland ay dhaqaale badan ku bixiso nabadgelyadeeda.
Geesta kale, Taliyaha ciidanka Booliska Somaliland Sareeye Gaas Maxamed Aadan Saqadhi (Dabagale), ayaa beeniyay in dowladda UK ay joojisay taageeradii ay siin jirtay Booliska Somaliland, balse masuuliyiin kale oo ka tirsan dowladda Somaliland ayaan arrintan ka hadlin.
Sikastaba, maalintii Khamiista ee 9-kii June, ayay ahayd markii Ciidamada Booliska Somaliland ay isku dhaceen dad mudaaharaadayaal ah oo Hargeysa ku sugnaa, ka dib markii ay mucaaradku ugu yeedheen ku celcelin iyo jihaynta dadka mudaharaadka dhigaya ee dalka oo dhan ka dhigaya ismaandhaafka siyaasadeed ee Madaxweynaha iyo in kale 13-ka November ee doorashada madaxtooyada.
Xisbiyada mucaaradka Somaliland, ayaa ku eedeeyay xukuumadda inay adeegsato awood xad dhaaf ah, sunta dadka ka ilmeysiisa, iyo xadhig aan sharci ahayn oo ay ku hayso mucaaradka, suxufiyiinta iyo mudaharaadayaasha.
Xukuumadda Somaliland, ayaa beenisay eeddaas, waxaanay sheegtay in dadka gadoodsan ay weerar ku soo qaadeen Ciidanka Booliska, isla markaana ay Ciidanka Booliska rasaas ku fureen Ciidamada Ammaanka musharaxa madaxweyne ee Xisbiga Waddani Cabdiraxmaan Maxamed Cabdillaahi Cirro.
Wasaaradda Arrimaha Dibeddu waxay soo saartay bayaanno kala duwan oo ay ku sharraxayso bannaanbaxa, waxaanay eedda dusha ka saartay xisbiyada mucaaradka ah oo ay xukuumaddu ku tilmaantay mudaharaad aan loo meel dayin oo ay rasaasta ku ridaan Booliska ay muujisay xakamaynta ugu badan.
Sidoo kale, Booliiska Somaliland, ayaa sheegay inay baadhitaan ku sameyn doonaan dhaawacyada ay sheegeen xubno ka tirsan xisbiyada mucaaradka ah oo uu ka mid yahay Xildhibaan Barkhad Batuun oo ka tirsan baarlamaanka Somaliland, kaasoo sheegay in rasaasta ay ka haleeshay qeybaha hoose.
Siyaasiyiin iyo Suxufiyiin ka kala tirsan Xisbiyada Mucaaradka ah oo xidhan, ayaa ka soo hor muuqday Maxkamadda Gobolka Maroodijeex, tan iyo markii la xidhay 9-kii June iyo Maalmihii dambe. Wax dambi ah laguma soo oogin, waxaana dowladda loo ogolaaday 7 maalmood oo dheeri ah oo xabsiga lagu sii hayo si baadhitaan dheeri ah loogu sameeyo. Maxkamadaha ayaa si joogta ah u siiya boliiska dib u celin dheeraad ah si ay u qabtaan tuhmanayaasha bilaa dambi.