Addis Ababa, (HargeisaPress) — Laba xubnood oo ka tirsan Waaxda Maamulka iyo Xisaabaadka ee Wasaaradda Arrimaha Dibadda & Iskaashiga Caalamiga ah JSL oo ayaa ka mid ayaa soo dhamaystay tababar toban maalmood ah oo ay ku qaateen xarunta Wasaaradda Maaliyadda ee Dawladda Federal-ka Ethiopia, magaalada Addis Ababa.
Tababarkan oo ku saabsanaa shaqada maaliyadda iyo xisaabaadka gaar ahaan hantidhawrka (Auditing) ayaa waxa u fidiyay shaqaalahan Wasaaradda Arrimaha Dibadda iyo hal wadeen oo ka socday Wasaaradd Maaliyadda Somaliland Hay’adda la yidhaaho HESPI (Horn Economic & Social Policy Institute) o xarunteeda guud tahay Addis Ababa.
Furitaankii kulanka tababarkaas ayaa waxa ka soo qaybgalay masuuliyiin ka socotay Wasaaradda Maaliyadda Ethiopia iyo Hay’adda Tababarka bixisay. Waxana halkaa ka hadlay Mudane Petter Roble oo ah Guddoomiyaha Gudida Sare ee Hay’adda HESPI oo soo dhaweeyay in hawlwadeenno ka socda Somaliland ay tababarkan u furan, waxanu sheegay inay joogtaynaynayaan fursadaha noocan ee ay shaqaalaha dawladda Somaliland aqoontooda iyo xirfadooda shaqo kor ugu qaadayaan.
Hawlwadeenadan ayaa waxa tababarkooda qayb ka ahaa booqashooyin ay ku tageen jaamacadda shaqaalaha dawladda Ethiopia iyo Wasaaradaha Caafimaadka iyo Maaliyadda, gaar ahaan waaxahooda khuseeya maaliyadda iyo xisaabaadka.
Gebagebadii tababarkaas, waxa soo xidhay agaasimaha fulinta Hay’adda HESPI Dr. Ali Essa iyo masuul ka socday Wasaaradda Maaliyadda Ethiopia.
Hawlwadeenada Wasaaradda Arrimaha Dibadda & Iskaashiga Caalamiga ah JSL ayaa kala ahaa Cabdiqani Axmed Xasan Goolle, Budget Manager (Candidate for PhD Economics) iyo Nuura Faarax Cawad, Xisaabiyaha Wasaaradda Arrimaha Dibadda Somaliland.
HargeisaPress News Desk — Hargeysa
hargeisapress@gmail.com