Yube (Hargeisa Press) – Wasiirka wasaaradda Shaqo-gelinta, Arrimaha Bulshada iyo Qoyska Somaliland Mustafe Maxamuud Cali Bile oo safar shaqo ku maraya qaybo ka mid ah gobolada bari ee dalka, ayaa gaadhay degmooyinka, Dabale Xagari, Shinbiraale, Carmale iyo Yube ee bariga gobolka Sanaag.
Waxaanu wasiirka shaqo-gelintu uu kormeeray goobaha diiwaangelinta codbixiyeyaashu ka socoto ee degmooyinkaasi.
Wasiirka iyo wefdiga uu hoggaaminayo, ayaa kulamo la yeeshay bulshada ku dhaqan deegaamadaasi, waxaanay iska xaal waraysteen arrimaha deegaamada iyo hawlaha qaranku ka wado.
Wasiir Mustafe Godane, ayaa Odayaasha, Waxgaradka iyo Bulshada ku booriyey inay door weyn ka qaataan wacyigelinta Diiwaangelinta codbixiyeyaasha Doorashada oo halkaasi si fiican uga socota.
Hormuudka bulshada deegaanadaasi, ayaa dhankooda soo dhaweeyey hawsha diiwaangelinta, waxaanay balanqaadeen inay si xilkasnimo leh uga qaybqaadanayaan hawshaasi.
Diiwaangelinta codbixiyeyaasha, ayaa si nabadgelyo ah uga socota guud ahaan goobaha loo asteeyey ee Dalka, waxaana kormeer iyo wacyigelin la xidhiidha sida ay u socoto, gobolada dalka ku maraya masuuliyiin ka tirsan xukuumadda Somaliland.