Maqale (Hargeisa Press.com): Wasaaradda horumarinta biyaha Somaliland iyo jaamacadda Maqale ee ku taalla dawlad degaanka Tigreega ee dalka Itoobiya, ayaa kala saxeexday heshiis ah in labada dhinac ay iska kaashadaan aqoonta biyaha.
Agaasimaha guud ee wasaaradda horumarinta Biyaha Somaliland Maxamed Yuusuf Ismaaciil, iyo wefti uu hoggaaminayo, oo ku sugan xarunta magaaladda Maqale ee waddanka Itoobiya, ayaa sheegay in heshiiskaasi ay ka mid tahay in jaamacadaasi ay wasaaradda horumarinta biyaha Somaliland gacan ka siiso sida loo kordhiyo dakhliga horumarinta biyaha.
Waxaanu sheegay agaasimaha guud ee wasaaradda biyuhu in maamulkaasi uu ka mid yahay kuwa ugu fiican ee ka faa’iidaysta biyaha roobka.
Waxaanu xusay in ay ka wada hadli doonaan siyaabaha ugu habboon ee biyaha roobka loo qaban karo, loogana faa’iidaysan lahaa.
Geesta kale weftiga agaasimaha guud ee wasaaradda horumarinta biyaha Somaliland ayaa lagu wadaa inay kulamo kala duwan la yeeshaan masuuliyiinta dawlad degaanka Tigreyga ee dalka Itoobiya.
Hargeisa Press.com/Hargaysa Office.