Hargaysa (HP): Musharaxa kursiga madaxweyne ee xisbiga mucaaradka ah ee WADDANI C/raxmaan Maxamed C/laahi (Cirro), oo safar dalka dibadda ugaga maqnaa ayaa maanta si balaadhan loogu soo dhaweeyay magaaladda Hargaysa.
C/raxmaan Cirro, ayaa markii uu garroonka diyaarradaha Hargaysa ka soo degay waxaa halkaasi ku soo dhaweeyay masuuliyiinta xisbiga WADDANI oo uu hor kacayay guddoomiyaha Waddani Xirsi Cali Xaaji Xasan, musharaxa jagadda madaxweyne ku-xigeenka.
Xildhibaanno ka tirsan golaha Wakiiladda, siyaasiyiin, iyo sidoo kale kumanaan taageereyaasha xisbiga Waddani ah oo isugu jiray haween, madax dhaqameed, odayaal, iyo dhalinyaro.
Kuwaasoo ku soo dhaweeyay kuna dhawaaqayay erayo iyo hal-ku-dhegyo ay ku muujinayeen taageeradda ay u hayaan musharaxa madaxweynaha Waddani, isla markaana ruxayay caleemo qoyan, astaanta ama calanka xisbiga Waddani, iyo boodhadh uu sawirka C/raxmaan Cirro ku xardhan yahay.
Kumanaankan taageereyaasha ah oo aad u jibaysnaa, isla markaana ay u shidnaayeen heeso lagu amaanayo xisbiga Waddani, ayaa subaxnimadii hore ee saaka iska xaadiriyay garroonka diyaaradaha Hargaysa.
Musharaxa madaxweynenimo ee xisbiga mucaaradka ah ee WADDAN C/raxmaan Maxamed C/laahi (Cirro), ayaa u mahad celiyay kumanaanka taageereyaasha ah ee maanta sida diiran u soo dhaweeyay.
DAAWO: Sawirradii Soo Dhawaynta Musharax C/raxmaan Cirro:
Hargeisa Press.com/Hargeisa Office.