Djibouti (Hargeisa Press)- Madaxweynaha Jamhuuriyadda Somaliland Cabdiraxmaan Maxamed Cabdillaahi (Cirro) oo weli ku gudo jira safarkiisii shaqo ee uu ku joogay dalka Djibouti, ayaa waxa uu kulan la yeeshay Safiiradda dalalka Faransiiska, Itoobiya iyo Boqortooyada Ingiriiska u fadhiya dalka Jamhuuriyada Jabuuti.
Kulankan Madaxweynaha Somaliland iyo Safiiradda, ayaa waxaa ay ujeedadiisu ahayd is xog-warrysi guud oo la xidhiidha Xaaladda Gobolka iyo doorka ay Somaliland ku leedahay.
Madaxweynaha Jamhuuriyadda Somaliland Cabdiraxmaan Maxamed Cabdillaahi Cirro, ayaa waxa uu Danjireyaasha Waddamada Faransiiska, Itoobiya iyo Boqortooyada Ingiriiska si gaar ah ugala hadlay arrimaha ay ka mid yihiin:, Ka wada shaqaynta arrimaha Amniga Gobolka iyo xoojinta iskaashiga xasilloonida Geeska Afrika iyo xallinta khilaafaadka ka jira Gobolka, isaga oo sheegay in ay Somaliland door muhiim ah ku leedahay arrimaha Amniga iyo Xasiloonida Gobolka.
Madaxweyne Cabdiraxmaan Cirro, waxa uu hoosta ka xarriiqay muhiimadda ay Gobolka Geeska Afrika u leedahay in la iska kaashado Amniga Badda Cas iyo Gacanka Cadmeed.
Dhinaca kale, Madaxweynaha Jamhuuriyadda Somaliland waxa uu saddexda Danjire kala hadlay horumarinta dhaqaalaha Gobolka, fursadaha maalgashiga, fududaynta ganacsiga, kobcinta mashaariicda kaabeyaasha, iyo kordhinta gargaarka bini’aadantinimo.
Madaxweynaha Jamhuuriyadda Somaliland waxa uu Danjireyaasha saddexdan dal ku boggaadiyey xidhiidhka iyo wada shaqaynta ay dalalkoodu la leeyihiin Jamhuuriyadda Somaliland, gaar ahaan Waddammada Itoobiya iyo Boqortooyada Ingiriiska oo iyagu Safiiro /Wakiilo ku leh Somaliland, isaga oo Dawladda Faransiiskana ku boorriyey in ay Somaliland ka furtaan Xafiis Safaaradeed.
