Djibouti, (HargeisaPress) — Madaxweynaha Somaliland Mudane Axmed Maxamed Maxamuud (Siilaanyo) Iyo wefti culus oo uu Hoggaaminayay ayaa maanta si weyn loogu soo dhaweeyay madaarka caalamiga ah ee Jabuuti, halkaasi oo loogu qaabilay hab maamuus sare, waxaana lagu muuneeyay baratool la mid ah kuw madaxda caalamka ee booqashada ku yimaada dalkaasi, waxaana soo dhaweeyay Raysal Wasaaraha Jamhuuriyadda Jabuuti Md, Cabdiqaadir Kaamil Maxamed, iyo Wasiirka Arrimaha dibadda Jabuuti Md. Maxamed Cali Yuusuf, Wasiirro iyo masuuliyiin kale.
Madaxweynaha Somaliland waxa loo dhigay Rooga cas, waxaanu salaan sharaf ka qaatay cutub ka mid ah ciidammadda qalabka sida ee Jamhuuriyadda Jabuuti. Iyadoo madaarkana lagaga gelbiyay Gaadiidka Baratakoolka ee wadanka Jabuuti.
Weftiga Madaxweyne Siilaanyo waxa Lagu dejiyay Huteelka Kaam-biski ee Jabuuti, waxaana halkaasi ku soo booqday Madaxweynaha Jamhuuriyadda Jabuuti Md, Ismaaciil Cumar Geelle, waxaanay labada madaxweyne ay yeesheen kulan gaar ah oo albaabadu u xidhnaayeen, kaasi oo ay ka wada hadleen sidii loo xoojin lahaa wax-wada qabsiga labada dal ee Somaliland iyo Jabuuti.
Madaxweynaha Somaliland waxa socdaalkan ku wehelinaya Marwadda Koowaad ee Jabuuti Marwo Aamina Sh, Maxamed Jirde (Aamina Waris), Wasiirrada Arrimaha dibadda, Madaxtooyadda, Xanaanada Xoolaha, Beeraha, Guddoomiye Ku xigeenadda koowaad ee Goleyaasha Wakiiladda iyo Guurtida, waxaanay dalka Jabuuti ku sugnaan doonaan mudo saddex maalmood ah iyadoo ay wada hadallo yeelan doonaan Madaxweynaha Soomaaliya Xasan Sheekh Maxamuud.
