Hargeisa (Hargeisa Press) – Hoggaanka saddexda xisbi qaran ee Somaliland, ayaa waxaa ay bulshada Somaliland u soo jeediyay in ay doorashada uga qayb-qaataan si nabad ah.
Waxaanay sidoo kale hoggaanka saddexda xisbi qaran ay bulshada Somaliland ugu baaqay inay ka digtoonaadaan talaabo kasta oo wiiqi karta habsami u socodka doorashada.
Guddoomiyeyaasha xisbiyada Ucid Faysal Cali Waraabe, Waddani Cabdiraxmaan Maxamed Cabdilaahi (Cirro) iyo Guddoomiye ku xigeenka 1aad ee Xisbiga Kulmiye ahna Wasiirka Arrimaha gudaha Maxamed Kaahin Axmed oo si wada jir ah Warbaahinta ula hadlay, ayaa ku guubaabiyey guud ahaan Shacabka Somaliland inay si waddaniyad ku jirto uga qayb qaataan Codbixinta doorashada ee beri iyadoo qof kastaa xor u yahay cida uu dooranayo.
Hoggaanka Saddexda Xisbi qaran waxaa kale oo ay u soo jeediyeen Murashixiinta ku loolamaysa doorashooyinka isku sidkani inay maanka ku hayaan inuu soo idlaaday Ololihii doorashadu isla markaana ay u hoggaansamaan Shuruucda doorashadda.
Waa markii ugu horaysay Taariikhda geedi socodka Doorashooyinka Somaliland ee ay dalka ka dhacayaan Laba doorasho oo isku Lamaan oo ay ku kala tartamayaan golayaasha Deegaanka 552 Murashax halka ta golaha Wakiillada ay ku loolamayaan 246 Murashax oo guud ahaan isku noqonaya 798 Murashax.
Waxaanay doorashadu ka dhici doontaa 23 Degmo doorasho oo dalka oo dhan ah, waxana la hawlgeliyey 11,000 oo askari, si 2,709 oo goobood ammaankooda loo sugo, intaana waxa dheer ciidamadii kale oo heegan ku jira oo xuduudaha dhammaantood xidhaya.