Hargeysa (Hargeisa Press)- Jaamacadda Admas University ee faraceeda magaalada Hargeysa, ayaa maanta munaasibad qalinjabin ah u qabatay dufcaddii 16aad ee ka qalin-jebisa jaamacadda.
Xaflad balaadhan oo loo sameeyay qalin jebinta ardaydaas waxaa ka soo qayb galay Madaxweyne ku xigeenka Somaliland, xubno ka mid ah golaha wasiirrada, masuuliyiin ka socotay dowladda Itoobiya, aqoonyahano, madaxda xisbiyadda qaranka, siyaasiyiin, maamulka iyo macalimiinta jaamacadda Admas, waalidiinta ardayda qalin jebisay iyo martisharaf kale oo tiro badan.
Madaxweyne ku xigeenka Somaliland C/raxmaan Ismaaciil Saylici, oo xafladaasi ka hadlay, ayaa u hanbalyeeyay ardayda qalin jebisay, waalidiintii ku soo tabcay, iyo macalimiintii wax soo barayay mudadii ay jaamacadda ku jireen.
Waxaanu yidhi “Waxaan hanbalyaynayaa maanta oo farxad ii ah, in qalin jabintii 16aad ee jaamacadda Admas aan joogno. Marka hore ardayda qalin jebiyay oo ay maalintoodii tahay waxaan leeyahay hanbalyo. Mustaqbal wanaagsan ayaanan idiiin rejaynayaa.
Waxa kaloo aan hanbalyaynayaa bahda jaamacadda Admas, maamulka, iyo macalimiinta, ee dedaalka badan soo geliyay in ay heerkan soo gaadhsiiyaan ardayda”.
Guddoomiyaha jaamacadda Admas Xuseen C/laahi Maxamuud, oo isna halkaa ka hadlay, ayaa ka warbixiyay tiradda ardayda jaamacadda ka qalin jebiyay, iyo heerarka waxbarasho ee ay qaateen.
Waxaana uu sheegay in Jaamacadda Admas laga aasaasay magaaladda Hargeysa sanadkii 2006-dii, isla-markaana mudadda ay shaqaynaysay ay ka qalin jebiyeen arday aad u tiro badan, kuwaas oo uu sheegay inay qaarkood ay dalka madax ka yihiin.
Hoos ka daawo muuqaalka