Hargeisa (Hargeisa Press) — Wefti ka socda Dowladda Ruushka, ayaa maanta soo gaadhay Caasimadda Somaliland ee Hargeysa.
Weftigan ayaa waxaa hoggaaminayay Agaasimaha Xafiiska iskaashiga Dhaqaalaha iyo Maalgashiga Dawlada Ruushka ee Qaarada Afrika, ee loo soo gaabsado, (AFROCOM), Mr. Stanislav Mezentsev.
Waxana Madaarka Hargeysa ku soo dhaweeyey Masuuliyiin uu ka mid yahay masuuliyiin ka tirsan xukuumadda iyo Wakiilka Somaliland ee Waddanka Jabuuti Danjire Cabdifataax Siciid Axmed.
Wakiilka Somaliland ee Jabuuti Cabdifataax Siciid oo ka hadlay ujeeddada socdaalka Weftiga Ruushka, ayaa sheegay inuu yahay mid ay ku doonayaan in ay ku indho indheeyaan maal gashi ay ku samayn karaan Somaliland.
“Ujeeddada Weftigan, waxa weeye sidii ay u indho indhayn lahaayeen maal gashi ay ku sameeyaan Somaliland, markii u dambaysay ee uu yimaado-na waxay ahayd 2008, markaas oo uu la kulmay Madaxweynihii hore Daahir Rayaale”ayuu yidhi Wakiilka Somaliland ee Jabuuti Cabdifataax Siciid.
Masuulka Weftigan Hoggaaminayay, ayaa waxaa uu sheegay in waddankiisu danaynayo xidhiidh iyo maal gashi uu ku sameeyo Jamnuuriyadda Somaliland.