Hargeysa, (HargeisaPress) — Guddida joogtada ah ee aqalka wakiillada Somaliland, ayaa maanta kulan xog waraysi ah la yeeshay Maareeyaha wakaaladda biyaha Hargeysa, waxaana lagu lafo guray halka ay marayaan mashaariicda biyo balaadhinta Hargeysa.
Guddoomiye kuxigeenka guddida xildhibaan Axmed Ducaale Bullaale, ayaa markii kulanku dhammaaday saxaafadda u sheegay inay warbixin waafi ah oo ku saabsan qorshaha biyo balaadhinta ee Hargeysa ka heleen Maareeyaha wakaaladda.
“Guddida halkan joogtaa waa guddidii joogtada ahayd oo kulan la yeeshay maareeyaha wakaaladda biyaha Hargeysa, waxaanu wax ka waydiinay baahida biyaha ee wakhti xaadirkan Hargeysa taala iyo duruufaheeda iyo wixii iska bedeli kara mustaqbalka. Warbixin aad u faahfaahsan buu naga siiyay arrimahaas, su’aalo badana xildhibaanadu way ka waydiiyeen arrimaha jira, jawaabo waafi ahna wuu na siiyay, intaas baanu kulakayagu ahaa” ayuu yidhi guddoomiye xigeenka guddidu.
Maareeyaha wakaaladda biyaha Ibraahin Siyaad Yoonis ayaa isna sheegay in guddida xog waran ka siiyeen mashaariicda biyaha ee hadda socda, qorshaha Mustaqbalka iyo hawlaha wakaaladdu u xilsaaran tahay. Waxa uu sheegay inay tafaasiil ka bixiyeen waxyaabaha mudaneyaasha madmadowgu kaga jiray.
Caasimada Somaliland ee Hargeysa ayaanay inta badani helin biyaha Khasabadaha, waxaanay ku tiirsan yihiin Booyadaha oo biyaha uga soo dhaamiya dooxyo ka fog magaalada Hargeysa, kuwaasi oo aanay jirin cid hubisa fayo qabkooda caafimaad iyo sida ay nadiifta u yihiin.
HargeisaPress News Desk — Hargeysa
hargeisapress@gmail.com