Djibouti (HargeisaPress) – Safiirka Somaliland u fadhiya magaalada Jabuuti Ambassador Cabdifatax Siciid Axmed, ayaa curashada bisha barakaysan ee Ramadaan awgeed Hambalyo iyo bogaadin u diray guud ahaan Bulshada Islaamka, gaar ahaanna shacabka Somaliland.
Qoraal uu saaray Safiirku ayuu sidaa ku sheegay, kaas oo uu ugu duceeyey Muslimiinta iyo dadka reer Somaliland, kuna soo dhaweeyey bisha barakaysan, ayaa u dhignaa sidatan:-
“Safiirka Somaliland u fadhiya Jabuuti Amb. Cabdifatax Siciid Axmed, oo ku Hadlaya magaciisa iyo ka Safaaradda Somaliland ee Jabuuti iyo shaqaalaheeda, Waxa uu Hambalyo u diraya, dhammaan Ummadda reer Somaliland, gudaha iyo dibeddaba, iyo Ummadda kale ee Muslimiinta ah ee ku kala nool daafaha Dunida, Munaasibadda Curashada Bisha Barakeysan ee Ramadaan awgeed.
Waxa aan dhammaan Ummadda reer Somaliland ku boorinayaa in ay ka faa’iidaystaan fursaddan qaaliga ah ee Bisha Barakeysan ee Ramadaanka in ay la yimaaddaan cibaado, isa-saamaxaad, samafal, iyo isu naxariisasho, taasi oo xoojinaysa Midnimada iyo Wadajirka bulshadeena.
Sida oo kale, waxa aan dhammaan Ummadda Muslimiinta ah Allah SWT uga baryayaa in uu ka aqbalo Soonka, Salaadda, iyo Acmaasha wanaagsan ee ay la yimaaddaan inta lagu jiro Bisha Barakeysan, isla markaana uu ka dulqaado dhibaatooyinka iyo caqabadaha haysta Ummadda Muslimiinta ah.
Alla Mahad leh:” Sidaa ayuu Safiirku qoraalkiisa ku yidhi.