Hargeysa (Hargeisa Press)- Madaxweynaha Jamhuuriyadda Somaliland, Dr. Cabdiraxmaan Maxamed Cabdillaahi Cirro, ayaa waxaa uu saaka kumanaan kun oo ka mid ah shacabka ku dhaqan caasimadda Somaliland ee Hargeysa kala qaybgalay tukashada Salaadda Ciidul-fidrida oo maanta la oogay.
Madaxweynaha Somaliland oo ay wehelinayaan xubno ka mid ah Golaha Wasiirrada, Taliyeyaasha Ciidamada kala duwan ee qaranka iyo xubno kale oo ka tirsan xukuumadda, ayaa tukashada Salaadda Ciidul-fidrida kala qayb-galay kumanaan qof oo ku tukanayey Masjid-Jaamaca Magaalada Hargeysa.
Intaasi kaddib, Madaxweynaha, ayaa salaadda kaddib bulshada u jeediyey khudbad dhinacyo kala duwan taabaneysa, taas ku salaysan muhiimadda ay leedahay nabada wada-jirka iyo isku duubnimada bulshadu.
Ugu horrayn, Madaxweyne Cabdiraxmaan Cirro, ayaa waxaa uu bulshada Somaliland Alle uga baryey inuu ka aqbalo cibaadadii, soonkii iyo acmaashii wanaagsanayd ee ay soo sameeyeen bishii barakeysnayd ee Ramadaan.
Ugu dambeyntii Madaxweynaha Jamhuuriyadda Somaliland, Cabdiraxmaan Maxamed Cabdillaahi Cirro, ayaa guud ahaanba shucuubta Islaamka, gaar ahaanna shacabka reer Somaliland ku bogaadiyey maalinta Ciidul-fidrida isaga oo Eebbena uga baryey inuu sanadkan sanadkiisa ku gaadhsiiyo, barwaaqo iyo dambi-dhaaf.
