Edmonton (Hargeisa Press)- Jaaliyadda Somaliland ee ku dhaqan magaalada Edmonton ee dalka Canada, ayaa si weyn u xusay sannad-guurada 34-aad ee ka soo wareegtay maalinta Qaranimada Somaliland ee 18-ka May, 2025-ka.
Dabaaldaga xamaasadda leh oo lagu qabtay fagaare aad u camiran, ayaa kulmisay jaaliyadda reer Somaliland iyo asxaabta si ay u maamuusaan hidahooda iyo taariikhdooda.
Dadkii ka soo qayb galay, ayaa waxa ay ku lebisnaayeen dharka hiddaha iyo dhaqanka iyo calanka Somaliland, kuwaas oo ka turjumaya adkaysiga iyo aayo ka tashiga, iyaga oo ku soo bandhigay farxad iyo xamaasad waddaniyadeed.
Qoysas, dhallinyaro, odayaal, iyo hoggaamiyeyaasha maxalliga ah, ayaa ku biiray mas’uuliyiinta dawladda Canada iyo marti-sharaftii si ay ugu dabbaal-degaan munaasabadda maalinta qaran ee Somaliland ee xuska 18-ka May, taasoo ka tarjumaysa is-dhexgalka bulshada iyo is-waafajinta dhaqamada kala duwan ee Edmonton.
Munaasibadan, ayaa waxa laga soo jeediyey khudbado xamaasad leh oo ka waramayey socdaalkii ay Somaliland soo martay, waxana aad loogu nuuxnuuxsaday halgankii taariikhiga ahaa ee ay u soo martay ictiraaf raadinta Somaliland iyo sida ay u tahay maalinta 18-ka May oo ah maalin qaran oo lagu faano.
Waxaa munaasibadda, ayaa lagu soo bandhigay bandhig faneedkan noqday kii ugu muhiimsanaa ee lagu soo bandhigay ciyaaraha hidaha iyo dhaqanka Soomaalida, gabayo xamaasad leh iyo heeso wadani ah oo ka turjumaya cajaladaha qani ku ah aqoonsiga Somaliland.
Ka qaybgelayaashu waxay dhadhamiyeen cunnada Soomaalida ee saxda ah, halka carruurtu ay ka qaybqaateen ciyaaraha dhaqameedka ee xiisaha leh, iyaga oo kobcinaya isku xidhka jiilasha.
Munaasibadda aadka u qiimaha badan, ayaa shahaado-sharafyo lagu guddoonsiiyey qaybaha bulshada iyo bah-wadaagta u soo hooyey qadiyadda Somaliland, isla markaana ka qayb-qaatay ilaalinta hiddaha iyo dhaqanka ee ay dalka dibeddiisa ku leedahay.
Dabaaldaggu kuma ekayn oo kaliya in lagu soo bandhigo hidaha iyo dhaqanka Somaliland, balse waxa ay sii xoojisay midnimada bulshada iyo sida ay uga go’an tahay in ay taariikhda dalkooda hooyo ku sii jirto masraxa caalamka.
Xafladan, ayaa waxa ay ku soo gebagebowday dareen cusub oo midnimo, taas oo hoosta ka xariiqday doorka bulshada Edmonton ee ah tilmaanta dareenka iyo himilada waara ee Somaliland.
