Hargeisa (Hargeisa Press) – Guddoomiyaha Maxkamadda Sare ee Somaliland ahna guddoomiyaha guddida cadaaladda jamhuuriyadda Somaliland garyaqaan Aadam Xaaji Cali Axmed, ayaa shaqadii ka joojiyay Garsoore ka tirsan Maxkamadda degmadda Maydh ee gobolka Sanaag.
Garsoorahan shaqada laga joojiyay ayaa lagu magacaabaa Axmed Maxamed Axmed, iyadoona uu guddoomiyuhu si ku meel gaadh ah uga joojiyay shaqada, sida lagu sheegay qoraal lagu baahiyay boga Maxkamada sare ee Somaliland ku leedahay Facbooga.
Sababta uu Guddoomiyaha shaqada garsoorenimo ee uu u hayay hay’adda garsoorka uga joojiyay ayaa lagu sheegay, ka dib markii la daraaseeyay cabashooyin is-xig-xigay oo guddoomiyaha maxkamadda Racfaanka gobolka Sanaag ka soo gudbiyay garsooraha.
Sidoo kalena la ogaaday in garsoore Axmed Maxamed Axmed uu galay arrimaha siyaasada ee la xidhiidha doorashooyinka imika socda, kuwaasi oo shaqada garsoorka mamnuuc ka ah.