Hargeysa , (HargeisaPress) —Madaxweynaha JSL Md Axmed Maxamed Maxamuud (Silaanyo), ayaa is casilaadii ka aqbalay wasiirkii Shaqada iyo Arrimaha Bulshada, isla markaana xilkaasi u magacaabay masuul cusub.
Sidaana waxa lagu cadeeyay war-saxaafadeed ka soo baxay madaxtooyada oo nuqul ka mid ahi uu soo gaadhay Shabakadda HargeisaPress, waxaanu u dhignaa sidan.
War-saxaafadeed
Madaxweynaha Jamhuuriyadda Somaliland, Mudane Axmed Maxamed Silaanyo, ayaa waxa uu maanta wareegto Madaxweyne oo summadeedu tahay JSL/M/XERM/249-5219/112017 uu Aqbalaad Is-casilaad kaga aqbalay Wasiirkii Hore ee Wasaaradda Shaqada iyo Arrimaha Bulshada isla markaana waxa uu ku magacaabay Wasiir cusub.
Aqbalaad Is-casilaad
Ujeeddo: Aqbalaad Is-casilaad
Ku: Mudane, Maxamed Cabdillaahi Obsiiye
Wasiirkii Hore ee Wasaaradda Shaqada iyo Arrimaha Bulshada
Mudane,
Aniga oo ka duulaya qoraalka aad i soo gaadhsiisay, ee ujeedadiisu tahay ka tagid xilkii aad haysay ee Wasiirka Wasaaradda Shaqada iyo Arrimaha Bulshada, waxaan kaa aqbalay is-casilaadaada aad ii soo gudbisay. Sidaa darteed, waxaan kuu rajaynayaa niyad-sami iyo mustaqbal wacan.
Magacaabid
Madaxweynuhu:-
Markuu Arkay: Qodobka 90aad, Faqradiisa 2aad ee Dastuurka Jamhuuriyadda Somaliland;
Markuu Tixgeliyey: Ahmiyadda ay Wasiirradu u leeyihiin Dalka iyo Dhismaha Qaranka;
Markuu Arkay: In baahi loo qabo buuxinta jagada Wasiirka Wasaaradda Shaqada iyo Arrimaha Bulshada;
Markuu Ka Fiirsaday: Kartidiisa, aqoontiisa iyo hufnaantiisa shaqo;
Markuu ku Qancay: Inuu hannan karo xilkan loo magacaabay;
Wuxuu go’aansaday
In Mudane, Cismaan Cabdi Sheekh Muxumed, laga bilaabo taariikhda maanta uu ahaado Wasiirka Wasaaradda Shaqada iyo Arrimaha Bulshada Jamhuuriyadda Somaliland.
ALLAA MAHAD LEH
Xuseen Aadan Cige (Deyr)
Af-hayeenka Madaxtooyada JSL