Laascaanood (HP): Maayarka magaaladda Laascaanood C/casiis Xuseen Maxamed, ayaa ka qayb galay munaasibad loo sameeyay xidhitaanka tartan ciyaareed Kubbadda cagta oo muddo ka socday magaaladaasi.
Tartankaasi oo muddo ka socday garroonka Kubbadda cagta Cabid Bille Cabdi, waxaa ka qayb qaadanayay kooxaha Kubbadda Cagta goobaha waxbarashadda Sare ee magaaladda Laascaanood.
Tartankaasi oo xiiso badan lahaa mudadii uu socday waxaa soo qaban qaabisay wasaaradda dhalinyaradda iyo ciyaaraha Somaliland gaar ahaana maamulka wasaaradda ee gobolka Sool.
Maayarka Laascaanood C/casiis Xuseen Taarwale, oo ciyaartii xidhitaanka tartankaasi ka qayb galay ayaa ku tilmaamay tartamadda noocan ah in ay qayb ka yihiin mashquulinta dhalinyarada si ay u helaan tartamo joogto ah.
C/casiis Taarwale, oo hadal ka jeediyay munaasibadii xidhitaanka ayaa ku hanbalyeeyay kooxdii ku guulaysatay tartankaasi oo ahayd Jaamacadda Nugaal iyo sidoo kale kooxdii Kaalinta 2aad gashay ee Gate way, oo uu maayarku ku amaanay in ay soo bandhigeen ciyaar qurux badan.
Waxaanu yidhi, “Waxaan ka qayb galay munaasibad balaadhan oo lagu soo xidhayay Tartanka Kubbadda Cagta goobaha waxbarashadda Sare ee magaaladda Laascaanood ee xarunta gobolka Sool.
Ugu horayn waan hambalyaynayaa Kooxdii ku guulaysatay tartanka, ee Jaamacadda Nugaal iyo kooxda Kaalinta 2aad gashay ee Gate way, oo runtii soo bandhigtay ciyaar qurux badan”.
Geesta kale maayarka Laascaanood ayaa ku bogaadiyay wasaaradda dhalinyaradda iyo ciyaaraha qabashadda tartankaasi.
“Dhankooda waxaan hambalyaynayaa wasaaradda dhalinyarada iyo Ciyaaraha ee gobolka Sool oo si wayn u soo abaabushay tartankan xiisaha badnaa.
Markasta na qayb ka ah mashquulinta dhalinyarada si ay u helaan tartamo joogto ah” ayuu yidhi maayarka Laascaanood C/casiis Taarwale.
Gebagebadii tartankaasi ayaa maayarka Laascaanood oo ay wehelinayeen masuuliyiinta wasaaradda ciyaaraha ee gobolka Sool waxay billaddo iyo abaal-marino guddoonsiiyeen kooxdii ku guulaysatay tartankaasi iyo kooxdii kaalinta labaad soo gashay.
Hargeisa Press.com/Hargeisa Office.