Hargeisa (Hargeisa Press) – Hoggaamiyaha xisbiga bah-wadaagta isbadal-doonka ee dalka Tanzania Zitto Mwami Ruyagwa Kabwe, oo ka mid ahaa Goob-joogeyaashii ka qayb-galay doorashadii Somaliland ka dhacday dhawaan, ayaa sheegay in aanu weli arag doorasho u daah-furan sida tii Somaliland ka dhacday.
Kabwe oo Somaliland u yimid korjoogtaynta doorashooyinkii isku sidkanaa ee Somaliland ka qabsoomay 31 May, ayaa sheegay in doorashooyinkaasi ay ahaayeen kuwii ugu caddaaladsanaa ee uu abid arko.
“Waxaan ka qayb-galay korjoogtaynta in ka badan 7 doorasho oo ka dhacay waddamada Koongo, Malawi, Mozambique, Uganda sidookalena waxaan ka qayb galay doorashooyin ka dhacay Tanzania”. Ayuu yidhi, waxaanu intaa ku daray “Xornimada, xalaalnimada iyo daah-furnaanta aan Somaliland ku arkay waa mid aan la labayn karin”
Kabwe oo qoraal ku baahiyey barta uu ku leeyahay Twitter-ka, ayaa shacabka Somaliland ugu hambalyeeyay doorashooyinka xorta ah ee ay galeen, isagoo sheegay in Somaliland ay qalbigiisa ku guulaysatay.
“Hambalyo dhamaan reer Somaliland, qalbigayga ayaad ku guulaysateen” ayuu yidhi.
Hoggaamiyaha mucaaridka dalka Tanzania iyo korjoogtadii kale ee ka socotay waddamada Afrika, ayaa isku raacay in doorashooyinkii 31 May Somaliland ka qabsoomay ay ahaayeen qaar xor ah oo xalaal ah.”