Nairobi, (HargeisaPress) — Wasiirka qorshaynta iyo horumarinta Somaliland Maxamed Ibraahim Aadan (Qabo), oo safar shaqo ku jooga magaaladda Nairobi ee dalka Kenya ayaa sheegay in uu kulamo la yeeshay hay’adaha Somaliland ka taageera arrimaha horumarinta.
Maxamed Ibraahim Aadan (Qabo), ayaa ku tilmaamay u jeedadda socdaalkiisa in uu la xidhiidho sidii qorshe looga yeelan lahaa bilaabitaanka wejiga labaad ee sanduuqa horumarinta Somaliland (SDF), isla markaana loo dejin lahaa mashaariicda la doonayo in laga maalgeliyo sanadka soo socda ee 2018-ka.
Wasiirka oo warbaahinta dawladda kula hadlay magaaladda Nairobi waxaa kulankaasi ku wehelinayay safiirka Somaliland ee Nairobi C/laahi Cabdi Cali, isagoo sharaxaad ka bixinayay u jeedadda socdaalkiisa waxa uu yidhi “Waxaan ku imid Nairobi booqasho gaaban oo dhar maalmood ah, u jeedadayduna waxay ahayd mashruuca horumarinta Somaliland ee SDF oo ay inga caawiyaan wadamadda Denmark iyo Netherland markaa dhawrkii bilaadba mar ayaanu shir qabanaa, shirkayagii ayaananu halkan (Nairobi) ku qabanay”.
Waxa kale oo uu wasiirku faah-faahin ka bixiyay mashaariicda kala duwan ee laga maalgeliyo sanaduuqa horumarinta ee SDF iyo halka ay marayaan. “Waxaananu ka wada hadlaynay mashaariicda socda maadaama oo SDF uu dhamaad ku jiro bisha September ee sanadkan 2017-ka, sidii aanu u bilaabi lahayn wejiga labaad ee SDF 2018-ka.
Sanaduuqani waxa uu Somaliland ka caawiyaa mashaariic badan, kuwaasi oo ah 11 mashruuc oo dalka ka socda, oo ay ka mid yihiin biyaha, wadooyinka, xagga degaanka sida buurta Gacan-libaax. Waxa kale oo ka mid ah mashuuca kalluumaysiga, caafimaadka, sida dhismaha cusbitaalka Ceerigaabo.
Mashaariicdaasi oo intooda badani ay dhamaad ku dhawyihiin ayaanu ka shiraynay, si fiican ayaananu iskula af-garanay. Waxa aanu aadka uga wadda hadlaynayna waxa uu ahaa mashruuca biyaha ee isku xidhaya Hora-haadlay iyo Geed-deeble, mashruucaasi oo aad muhiim ugu ah sidii ay magaaladda Hargaysa biyo ku filan u heli lahayd” ayuu yidhi wasiirka qorshaynta.
Geesta kale wasiir Qabo, waxa uu sheegay in mudadii uu joogay Nairobi in ay kulamo la yeesheen shirkadda Jarmalka ah ee Somaliland ka caawisa dhinaca biyo balaadhnta magaaladda Hargaysa iyo masuuliyiin ka socday hay’adaha qaadhaan bixiyeyaasha ah.
Waxaanu yidhi “Waxaan la kulanay hay’adda Jarmalka ah ee KMW oo inaga caawisa xagga biyo balaadhinta magaaladda Hargaysa oo ilaa $20 milyan bixiyay. Waxa kale oo aanu la kulanay qaadhaan bixiyeyaasha, si fiican ayaananu iskula af-garanay arrimihii aanu ka wada hadalnay”.
HargeisaPress News Desk — Hargeysa