Hargaysa (Hargeisa Press.com): Xukuumadda jamhuuriyadda Somaliland ayaa uga digtay shirkad Shiine ah oo dawladda federaalka Soomaaliya ruqsad u siisay in ay ka kalluumaysan karaan Baddaha Soomaaliya oo kuwa Somaliland-na ku jiraan.
Waxaanay Somaliland kaga jawaabtay arrintaasi in haddii shirkadahaasi ay soo galaan Baddaheeda in loola dhaqmi doono in ay ku kaceen kalluumaysi sharci darro ah, isla markaana ciqaab la marin doono.
Wasiirka khayraadka Baddaha iyo kalluumaysiga dawladda federaalka Soomaaliya oo todobaadkan la hadlay BBC ayaa sheegay in 31 ruqsadood ay shirkadda dalka Shiinaha laga leeyahay heshiis kula galeen in ay ka kalluumaysan karaan Baddaha Soomaaliya.
Hase yeeshee wasiirka kalluumaysiga iyo xanaanadda xoolaha Somaliland Xasan Gaafaadhi, oo arrintaa ka jawaabay ayaa sheegay in aanay waxba ka khusaynin ogolaanshiyaha ay Soomaaliya siisay shirkadda Shiinaha ah.
“Ruqsadda ay dawladda Faderaalku bixisay wax Allaale wax ka khuseeyaa ma jiraan Jamhuuriyadda Somaliland. Waxaanay ku eeg tahay inta xukuumaddaasi isku mashquulsani ay xukunto”ayuu yidhi Xasan Gaafaadhi, oo shir jaraa’id ku qabtay xafiiskiisa.
Wasiir Gaafaadhi, oo hadalka sii watay waxa uu yidhi “Waxaanu leenahay cid kastoo la siiyay ruqsadaasi in aanay ku jirin biyo Baddeedka Somaliland oo aanay wax na ka khusaynin. Somaliland Baddeeda iyo Barrigeeda, way ilaashataa, waanay difaacan kartaa.
Cidkastoo lagu qabto iyadoo maraysa biyo-Baddeedka Somaliland ama iyadoo sidata Kalluun meeshay doonta ba ha ka keentee, waxaa loola macaamilayaa sidii Kalluun ay ka guratay Badda Somaliland.
Waxaana la marinayaa ciqaabta ku waajibtay. Waxaanu uga digaynaa cidkastaaba inay ixtiraamto isla markaana aanay ku darsanin ruqsadaha beenta ah, ee dawladda itaalka darani ay bixisay”.
“Ruqsadii maraakiibta shisheeye kaga Kalluumeysan jireen Badaha Jamhuuriyada Somaliland waa la joojiyay oo waxay wasaaraddu joojisay Jeenawari 11-keedii sidii ayaanay wali sideedi u taagan tahay”ayuu yidhi wasiirka kalluumaysiga Somaliland.
Hargeisa Press.com/Hargaysa Somaliland